Xoşqədəmdən Almaza sərt cavab
"Ölkə.Az"-ın məlumatına görə, verilişin daimi ekspertlərindən olan vəkil Şəfiqə Nağıyeva Almaz Ələsgərovaya etiraz olaraq, şikayətçilərin kürsüsündə əyləşib və bunları deyib:
"Bəzi insanlar deyir ki, divanda oturmaq olmaz. Orada şikayətçilər oturur. Bu şikayətçilər hər birimiz ola bilərik. Önəmli olan harada oturmaq yox, fikrini xalqa çatdırmaqdır. Şikayətçilər bardaş qurub yerdə otursalar, mən də onlarla oturacağam".
Verilişin aparıcısı Xoşqədəm Hidayətqızı isə bildirib ki, o, qonaqların yerini müəyyən etmir:
"Mən bu məsələyə münasibət bildirəcəkdim. Şəfiqə xanımın gəlib divanda oturmağı bir çoxlarına cavabdır. Əziz tamaşaçılar, istəyirəm hər kəs bilsin. Heç vaxt yer davası etmədim, amma sağlam rəqabətə girib birincilik davası etdim. Hər zaman gecə-gündüz çalışmağımla, əziyyətimlə, arxadan vurmaqla yox. Bunu əvvəl işlədiyim televiziyalarda da görüblər. Uşağımı görmədiyim günlər də olub. Altı il Rusiyada, İraqda, Əfqanıstanda, Suriyada, ən çətin yerlərdə çəkilişlər etmişik, amma heç vaxt yer davası etməmişəm. Çünki məni həmişə işim maraqlandırır. Bu layihənin rəhbəriyəm, onlarla işçim var və qonaqların yerini də onlar müəyyən edirlər. Sanki layihə rəhbəri hansısa qonağa yer göstərir. Bu insanlara canım qurban. Sabah heç kəs bilmir, Xoşqədəm bəlkə onların yerində oturacaq, hətta onu bu studiyaya qəbul etməyəcəklər. Bunlar dərdli insanlardır. Orada oturursa, bu insanlar pisdir? Allah eşqinə, bizləri biz edən tamaşaçılardır, canım sizə qurban olsun. Allah sizin bizə dəstəyinizi əlimizdən almasın, sizin sevginiz azaldığı gün Allah mənim canımı alsın. Alim Qasımovdan böyük bir sənətkar varmı? O da bu divanda oturub. İnsan kimi insan, sənətkar kimi sənətkar, ailə başçısı kimi də ailə başçısı. Millət vəkilləri, professorlar o kürsüdə əyləşiblər, onlardan artıqsınızmı?"
X.Hidayətqızı efirə dəvət olunan qonaqlara xəbərdarlıq da edib:
"Efirə gecikməyəcəksiniz. Gecikən qonaqları studiyaya buraxmayacağam. Çünki tamaşaçıya və televiziyaya hörmətsizlikdir. Tıxacları, nəqliyyatı nəzər alıb tez çıxmaq lazımdır. Komanda üzvlərinə demişəm ki, elə qonaq çağırın, burada tamaşaçıya söz deməyə layiq olsun. Necə deyərlər, gecikən qonaq öz kisəsindən yeyər".
Qeyd edək ki, "Bizə danış"ın bir neçə gün öncəki buraxılışında əməkdar artist verilişə gecikdiyi üçün şikayətçilər kürsüsündə oturdulmağına etiraz əlaməti olaraq, proqramı tərk etmişdi.
İntiqam VALEHOĞLU
Ölkə.Az
