Murad Arif: "Mən Elnuru hər dəfə efirə çağırırdım, amma o gəlmirdi"

Elnur Hüseynovun "O səs Türkiyə" yarışmasındakı çıxışına Murad Arifdən maraqlı şərh gəlib.

Ölkə.az-a danışan Murad Arif Elnuru hər dəfə efirə qonaq çağırdığını, amma onun efirə gəlmədiyini bildirib.

"Hadisə öz ölkəsində ulduzdur, Elnur isə Türkiyədə bir o qədər də tanınmır. Burada bir uyğunsuzuq var, əslində. Belə baxanda hər ikisə də eurovision musiqi yarışmasının iştirakçı olub. Elnurun səs imkanları, onun istedadı münsiflər heyətində olan hər kəsdən üstündür, təkcə Ebrunu çıxmaq şərti ilə. Çox istəyərdik ki, o, Azərbaycanda hər zaman gündəmdə olsun, çünki o çox layiqli iştirakçıdır.

Mən deyərdim ki, bəlkə də ölkəmizdə onun kimi oxuyan yoxdur. Sadəcə efirə çox az çıxır. Düşünürəm ki, burada onun da müəyyən günahları var. Çünki mövcud durumdan maksimum dərəcədə istifadə etmək lazım idi. İnsanlar efirə çıxmayan müğənniləri unudurlar. Müğənni öz istedadının sahibi deyil, o, istedadının ötürücüsüdür. Hesab edirəm ki, Elnur yaxşı ifaçı olmaqla yanaşı, həm də çox pis ötürücüdür. Mən özüm onu nə qədər verilişə qonaq çağırsam da, amma o, hər dəfə nəyə görəsə gəlmirdi. Mənə belə gəlir ki, yəqin o, nədənsə küsüb. Buna görə də, efirə çıxmır".

Qeyd edək ki, dünən "O səs Türkiyə" yarışmasında “Lutch” kompozisiyasını ifa edən Elnur öz çıxışı ilə onu izləyənləri heyran etmişdi.

Fatimə İbrahimova
Ölke.az