Tampliyerlərin Vahid Avropa planı

Bu gün "Ölkə.Az" oxucularına tampliyerlərin Vahid Avropa planı haqqında məlumat verəcək.

Bəzi tarixi mənbələrə əsaslanan tədqiqatçılar bildirirlər ki, tampliyerlərin sərvəti istənilən Qərbi Avropa hökmdarının xəzinəsindən qat-qat çox idi. Bundan başqa, 1118-ci ildə qurulan orden 50 il ərzində Avropanın ən qüdrətli və nüfuzlu təşkilatına çevrilir. Tampliyerlər məbədlərin tikintisini maliyyələşdirir, yollar inşa edir, beynəlxalq bankirlərə çevrilir və hətta Kolumbdan da əvvəl Amerikaya səyahət edirdilər.

Fransız kralı IV Filipin borcu çox idi. Müstəqil, çox varlı ordenin mövcudluğu krala rahatlıq vermirdi. Filipp ordenin kafirliyi barədə şayiədən istifadə edərək Papanın xeyir-duası ilə məbəd cəngavərlərini həbs etməyə başladı. İşgəncələrin dəhşətli olduğunu ordenin cəngavərlərindən birinin sözü ilə başa düşmək olar: "Mən hər şeyi etiraf edərdim. Əgər onlar tələb etsəydilər, Allahı da öldürdüyümü etiraf edərdim".

Baş inkivizitor Jan de Marinyi orden cəngavərlərinə işgəncə verərək heç bir şey öyrənə bilmədi. Cəngavərlər ordenin sirrlərini açmadılar və küfr barədə ittihamları rədd etdilər. Cəlladların cəngavərləri tonqalda yandırmaqdan başqa çarələri qalmadı. Tampliyerlərə qarşı krallığın heç bir qanunu tətbiq edilmədi. Küfrdən imtina edən cadugəri əfv edərək azad edirdilər. Amma küfrdən imtina edən tampliyerləri tonqalda yandırırdılar. Ordenin üzvlərinin məhvi ilə paralel əmlak müsadirəsi də qızışmışdı.

Tampliyerlər ordeninin magistri Jak de Mole tonqala atılanda Fransa kralı IV Filipp, Papa V Kliment və yaxın müşaviri monarx e Noqareni Tanrı məhkəməsinə çağırdı. Magistr onlara və nəsillərinə lənət yağdırdı: "Papa Kliment! Cəngavər Giyom de Noqare! Kral Filipp! Bir il keçməyəcək ki, mən sizi Tanrı məhkəməsinə çağıracam və sizə cəza veriləcək! Lənət! Sizin on üçüncü qurşağa qədər nəsliniz lənətləndi!!!"

İki həftə sonra Papa V Kliment qəfil xəstəlikdən vəfat etdi. Bir neçə gün sonra isə cəngavər de Noqare də ölüm taxtına əyləşdi. Deyilənə görə Noqareyə nifrətini gizlətməyən qrafinya Matilda Artua cəngavərin ölümünü sürətləndirib. Qrafinya deyirdi: "Tanrı mərhəmətlidir və əgər o tampliyerlərin magistrinin lənətini həyata keçirməyə tələsmirsə, mən ona kömək edərəm!"

Filipp də uzun müddət yaşamadı. Eyni ilin noyabr ayında qəflətən insult keçirərək öldü. Atanın taleyi oğullarının da qismətinə yazılmışdı. Filippin 3 oğlunu xalq arasında "lənətlənmiş krallar" adlandırırdılar. 14 il ərzində növbə ilə krallar müəmmalı şəraitdə həlak oldular və nəsilləri kəsildi. Sonuncu kral-VI Karlın ölümündən sonra Kapetinqlər xanədanının hakimiyyətini başa çatdırdı.

Amma Fransa taxtına əyləşən Valua sülaləsi də gözlənilməz bədbəxtliklərlə üzləşdi. 1337-ci ildə məşhur Yüzillik müharibə başladı. Müharibə baxtı Valualardan biri-Mehriban İoann ingilis əsarətində öldü. V Karl isə ağlını itirdi. Valua xanədanının üzvlərinin faciəli taleyi başladı. II Henrix turnirdə öldürüldü. II Fransisk həkim səhvi ucbatından həlak oldu. IX Karl zəhərləndi. III Henrix isə fanatı olan qadın tərəfindən qətlə yetirildi.

Valua sülaləsini əvəz edən Burbonlar da Jak de Molenin lənətindən qurtula bilmədilər. İlk Burbon-kral IV Henrix qatil tərəfindən bıçaqlandı. Sonuncu kral XVI Lüdoviq isə eşafotda öldü.

Maraqlı fakt odur ki, edamdan əvvəl kral Tampl qülləsində saxlanılıb. Bu qəsr əvvəllər tampliyerlər ordeninin məbədi sayılırdı. Hadisə şahidləri bildirirlər ki, edamdan sonra kimsə "Jak de Mole, qisasın alındı!" deyərək qışqırıb.

Filipp tampliyerlərin xəzinəsini tapa bimədi. Ordenin var-dövlətinin gizlədildiyi yer barədə çoxlu söz-söhbət və ehtimal gəzirdi. Məsələn, Fransa sahillərindən qızıl ilə dolu gəminin yola düşdüyü deyilirdi. Bu günə qədər də tampliyerlərin gizli arxivi tapılmayıb.

Tampliyerlərin işində sirr və tapmaca çoxdur. Görəsən məbəd cəngavərlərinin bu qədər maddi və mənəvi sərvətini harada gizlətmək olardı? Görəsən niyə tampliyerlər Dairəvi Qardaşlıq Masası və kral Artur haqqında əfsanələri diriltdilər? Görəsən həqiqətən də cəngavərlər xristianlığın ən böyük tütyələrindən biri-Müqəddəs Qədəhin mühafizəçiləri idilərmi? Ordenin minlərlə cəngavəri bu böyüklükdə mənəvi gücü haradan alırdılar? Əslində tampliyerlər kim idi-Tanrının xidmətçiləri, yoxsa şər qüvvələrə tabe olanlar? Onlar kafir idilər, yoxsa sui-qəsdə qurban getdilər?

Bəzi tədqiqatçıların fikrinə görə, aristokratların və monarxların çoxsaylı ianələri tampliyerlərin var-dövlət mənbəyi ola bilər. Amma ianələr təkcə məbəd cəngavərləri üçün ayrılmırdı. XII-XIII əsrlərdə tampliyerlərin nüfuzu, gücü və var-dövləti inanılmaz ölçülərə çatmışdı. Səbəb nə idi?

Tampliyerlərin dövründə Avropada gümüş yataqları kifayət qədər az idi. Amma orden mənsubları məhz gümüş sikkələrlə ödəniş edirdilər. Bu qədər gümüş onlarda haradan idi?

Başqa bir ehtimal da var. Məbəd cəngavərləri müsəlman dünyası ilə normal münasibətlər qurmuşdu. Ehtimal edilir ki, yaxşı aparılan ticarət tampliyerlərə böyük gəlirlər qazandırırdı.

Bir çox tədqiqatçının fikrinə görə, çoxsaylı maliyyə əməliyyatları, Kilsə və Avropa ölkələrinin hökmdarlarına əhəmiyyət verməmək kimi əməllər ordenin ölümünü sürətləndirdi.

Sadəcə bir sual hələ də cavabsız qalıb. Peşəkar hərbçi-monarxları olan Qüdrətli hərbi-dini orden niyə özünü məhv etməyə icazə verdi?

Tarixçilərin fikrinə görə böyük maliyyə imkanlarına sahib qüdrətli hərbi strukturun yaradılması böyük plana xidmət edirdi. Güman edilir ki, məqsəd vahid hökmdar və iqtisadiyyata malik vahid Avropa qurmaq olub.

Tampliyerlər əsasən vahid Avropa iqtisadiyyatının pul-kredit sistemini təklif edirdilər. Bu sistem ordendə tətbiq edilirdi. Avropada siyasi hakimiyyətə Merovinqlər sülaləsini gətirmək planlaşdırılmışdı. Merovinqlər İsa Peyğəmbərin nəslindən gəlir. Orden cəngavərləri qarşılarına elə məqsəd qoymuşdular ki, hətta bu gün də bu tapşırığın öhdəsindən gəlmək mümkün deyil.

Müasir bankirlər kredit-maliyyə sisteminin qurulmasında tampliyerlərin rolu olduğunu etiraf edirlər. Məbəd cəngavərləri bütün Avropada elə bir sistem qurmuşdular ki, bu sistem müasir bank kapitalı sistemi ilə eyni idi. Onlar kilsənin qadağasını pozmaqdan çəkinmirdilər. Kilsə qanununa əsasən, xristianlar faiz pul yeməməli idilər. Bu pul qazanc sayılmırdı.

Orta Əsrlər qanunlarına əsasən, sələmçiliyin qarət və oğurluğa səbəb olacağı düşünülürdü. Bu işlə ancaq yəhudilər məşğul ola bilərdilər. Çünki onlar başqa dinə qulluq edirdilər.

Tampliyerlər XIV əsrdə Vahid Avropa ideyasını reallaşdıra bilmədilər. Çünki Avropa belə radikal dəyişikliklərə hazır deyildi.

Kral Filipp tampliyerlərin planından xəbərsiz idi. Amma o, ordeni imperiyası və öz nüfuzu üçün təhlükə sayırdı. Orden çox böyük nüfuza sahib idi. Tampliyerlər güclü dünyalarla əlaqə qurur, dünyanın bütün regionları ilə əlaqə saxlayır, istənilən sekta və təlimi idarə edə bilirdilər.

Filipp Roma imperiyasının tacını başına qoymaq barədə planlar qururdu. Amma qorxurdu ki, tampliyerlər bu planı reallaşdırmağa mane ola bilərlər. Fransa xəzinəsi boşalmışdı. Xalq get-gedə etiraz səsini qaldırırdı. Tampliyerlər isə çox varlı idilər və Filipp onlardan çoxlu kredit götürmüşdü. Onun ordenə olan münasibəti tarixə hökmdar kimi yox, orden üzvlərini qətlə yetirən qatil və oğru kimi düşməsinə səbəb oldu.

Amma tampliyerləri hər yerdə təqib edib öldürmürdülər. Şotlandiya orden üzvlərinə qucaq açan ölkələrdən biridir. Ordenin bir çox cəngavəri digər hərbi-dini ordenlərin sırasına daxil oldu. Məsələn, Malta ordeni, Süleyman məbədinin ordeni, İsa cəngavərləri ordeni. Vasko de Qamma və şahzadə Enrike də İsa cəngavərləri ordeninin üzvləri olublar. Orden Portuqaliyada yerləşirdi. Şahzadə Portuqaliyada gəmi inşasının inkişafına diqqət ayırırdı. O, yeni torpaqların kəşfi və tədqiqatı üçün gəmiləri maliyyələşdirirdi. Gəmilər tampliyer bayrağı altında səyahətə çıxırdılar. Tampliyer simvolu Kolumbun da gəmilərində var idi.

Bu günə qədər də, tampliyerlərin qiymətsiz arxivinin yeri sirr olaraq qalıb. Güman ki, bəşəriyyət yaxın gələcəkdə bu arxivə qovuşacaq...