Zibillikdən çiçək açmış ölkə və ya İsveçrə tullantı problemini necə həll etdi?

İsveçrədə hər şey növləşdirilir.

Dünyada ən böyük problemlərdən biri və birincisi ekoloji təmizliyin qorunmasıdır. Yer kürəsində elə bir nöqtə yoxdur ki, tullantılarla bağlı çətinlik yaşamasın, ancaq İsveçrə yeganə yerdir ki, burada bu problemin öhdəsindən qismən də olsa gəlmək üçün yeni və bir o qədər mürəkkəb olmayan üsul fikirləşiblər.

80-ci illərdə İsveçrədə ekologiya acınacaqlı vəziyyətdə olub. Yeni ekologiya siyasətinin gerçəkləşdirilməsinə uzun illər sərf olunsa da, nəticələr göz qabağındadır və sevindiricidir. İndi İsveçrə dünyanın ən təmiz və gözəl ölkələrindəndir.

İsveçrədə bütün vətəndaşlar tullantıları müxtəlif qablar üzrə növləşdirməyə borcludurlar. Əgər sən bu qanunla razı deyilsənsə, yüksəkməbləğli cərimə ödəməli olacaqsan. İsveçrə dünyada şüşə qabların təhvil verilməsinə görə birinci yerdədir. Şüşə qabların 90 faizi yenidən işlənmək üçün lazımi məntəqələrə verilir. Qablar rənginə görə bölünür və qapaqsız şəkildə qəbul olunur. Karton və kağızlar da növləşdirilir, ancaq kartonun emalı çox baha başa gəlir. İsveçrədə olan çap məhsullarının üçdə biri emala göndərilir. Ölkədə satılan batareyaların 60 faizi ikinci əl xammalı üçün tikilmiş emal məntəqələrinə çatdırılır.

Növləşdirilməsi məcburi olan istifadə edilmiş nəsnələr bəzilərini qorxudur. Onlara tikinti tullantıları, işıq lampası, avtomobil yağının qalıqları, konserv bankaları, elektrik qurğular və s. Ən maraqlısı odur ki, heyvan cəsədlərini basdırmaq qadağandır. Onları da müəyyən ödəniş müqabilində təhvil vermək lazımdır.

Bəziləri düşünə bilər ki, bütün bu sadalananları etməmək də olar. Ancaq bu, qətiyyən elə deyil, çünki tullanan zibillərə görə dövlətə xüsusi vergi vermək tələb olunur. Bu səbəbdən də isveçrəlilər əllərinə düşən hər şeyi emal məntəqələsrinə aparır və əlavə ödənişdən azad olurlar.

Bundan başqa, İsveçrədə küçədə qoyulmuş və vergisi ödənilməmiş tullantıların nəzarəti ilə məşğul olan xüsusi polis bölmələri vardır. Qanunu pozanları ciddi cərimələr gözləyir.

Əgər sən göz oxşayan gözəlliklərlə dolu və təmiz ekologiyası olan məmləkətdə yaşamağı arzu edirsənsə, birinci özündən başla!