Bu gün Dünya Təbəssüm Günüdür

Oktyabrın 3-də Dünya Təbəssüm Günü qeyd olunur

Bu günü qeyd etməyi XX əsrdə ABŞ rəssamı Harvi Bell təklif edib. Hazırda H.Bellin hekayəsini dünyanın çox ölkələrində yaxşı bilirlər. Deyə bilmərik ki, o, çox böyük və ya xüsusi istedada malik bir rəssam olub. Heç özü də belə düşünməyib. Sadəcə sevdiyi işlə məşğul olub. Lakin bir gün aldığı sifariş sayəsində tezliklə məşhur və tanınmış adama çevrilib.

Adətən, bu əhvalat internetdən istifadə edən hər kəsə yaxşı tanış olan bir simvolun – smaylikin necə yaranması barədə danışanda yada düşür. Əslində, Bellin smayliki başqa məqsəd üçün düşünülüb. Məsələ bundadır ki, iki sığorta şirkətinin birləşməsi prosesində çoxlu çətinliklər üzə çıxır. Yaranan vəziyyət əməkdaşlara pis təsir edir. Vəziyyətin daha da pisləşəcəyini gözləyən əməkdaşlar bədbin, əsəbi və dalğın görünürlər. Onların bu halı potensial müştərilərə də sirayət edir. Onda şirkətin rəhbərliyi qərara gəlir ki, parlaq və fərqli bir simvoldan vizit kartı kimi istifadə olunsa, vəziyyət düzələr. Bu məqsədlə rəssam Bellə müraciət edirlər. O da təbəssümü qulaqlarına qədər uzanan şən və dəyirmi sifət çəkir. Şirkətin əməkdaşları rəssamın eskizi əsasında hazırlanan nişanları taxanda əhval-ruhiyyələri yüksəlir: onlar da, yaxalarında gəzdirdikləri smaylik də müştəriləri təbəssümlə qarşılayır. Möcüzə baş verir: şirkətin işləri yağ kimi getməyə başlayır.

Tezliklə smayliklər təsvir üçün münasib olan hər yerdə, o cümlədən geyimdə, qab-qacaqda görünməyə başlayır. Bellin təsvir etdiyi tünd sarı rəngli məzəli sifət bütün dünyanı fəth edir.

İdeyasının uğur qazanmasından ruhlanan rəssam hər il oktyabr ayının ilk cümə gününü Dünya Təbəssüm Günü kimi qeyd etməyi təklif edir. Həmin gün ilk dəfə 1999-cu ildə qeyd olunur. Təbəssüm gününün sloqanını da rəssam özü düşünüb tapıb: “Do an act of kindness. Help one person smile”, yəni “Xeyirxah iş gör. Heç olmazsa, bircə təbəssümün yaranmasına kömək et”./Azərtac/

Ölkə.Az