Bakıda "Yer saatı" kampaniyası keçirildi

İşıqlar söndürüldü, şamlar yandırıldı...

Ölkə.Az xəbər verir ki, martın 28-i Bakıda "Yer saatı" ("Earth Hour 2015") beynəlxalq kampaniyası keçirilib.

"Yer saatı" ("Earth Hour 2015") adlanan beynəlxalq kampaniya çərçivəsində dünyanın müxtəlif bölgələrində yaşayan bir milyarddan çox adam insan dəyişikliyinə qarşı həmrəylik nümayiş etdirmək üçün bir yerə toplaşıb. Hadisə saat 20:30-a təsadüf edib və aksiya çərçivəsində insanlar iqlim dəyişikliyi probleminə diqqəti çoxaltmaq üçün bir saatlığa işığı və həmin vaxt vacib olmayan digər elektrik cihazlarını söndürüblər. Bu il proqram çərçivəsində qlobal aksiyanın iştirakçıları özləri ilə fənər, alışqan və digər vasitələri götürərək saat 20:00-da Azadlıq meydanında toplaşıblar. Bir saat ərzində - saat 20:30-dan 21:30-dək Hökumət evinin və "Marriott Absheron" otelinin fasadının işıqlandırılması tamamilə dayandırılıb. Tədbir çərçivəsində "Critical Mass Baku" veloturu da keçirilib. "Yer saatı" ("Earth Hour 2015") saat 22:00-da başa çatıb.

Ümumdünya Vəhşi Təbiət Fondunun (WWF) keçirdiyi beynəlxalq kampaniya hər il martın son şənbə günündə baş tutur. Ümumiyyətlə, "Yer saatı" ("Earth Hour") təbiətə qayğıkeş münasibətin, planetimizin məhdud resurslarına qayğının rəmzidir.

Xatırladaq ki, bu aksiya ilk dəfə 2007-ci ildə Sidneydə keçirilib. Azərbaycanda isə "Yer saatı" ("Earth Hour") 2011-ci il martın 26-da Bakının əsas rəmzi olan Qız qalasında və "İçərişəhər" Dövlət Tarix-Memarlıq Qoruğunda həyata keçirilib.