Əxlaqsızlıq nədir?

Əxlaq problemi yaşayanların ən çox toxunduğu mövzudu əxlaq mövzusu...

Kimin əxlaqında problem varsa ən çox o şəxs danışır əxlaqdan. Əxlaq geniş mənada işlədilən bir qavramdır, cinsəllikdən iş həyatına, məsləyə, peşəyə qədər hər tərəfi əhatə edir. Bu yazımızda hələlik cinsəlliyə toxunmayacağıq.

Məsələn siyasi əxlaq - Siyasi əqidəsini pula və ya vəzifəyə satmaq, keçmiş hərəkat yoldaşlarını "siyasi görüşlərini" dəyişəndən sonra gözdən salmağa çalışmaq, rezin qaloşdan və "kitayski koftadan" çıxıb bahalı geyimlər geyinəndən sonra Allahını və imanını belə unutmaqdır əxlaqsızlıq. Ən yeni tariximizdə belə halların dəfələrlə şahidi olmuşuq. Deputat mandatına mənliyini satmışların etdiyi siyasi fahişəlik televiziya ekranlarında və mətbuatın səhifələrində detalları ilə sərgilənib və xalq belə əxlaqsızları çox gözəl tanıyır.

İllərlə müxalif bir mətbu orqana yazdığı yazılardan aldığı qanorarla dolananların, yazdığı köşələrdə Ulu öndəri, onun siyasi irsini, hətta ailəsini və şəxsiyyətini belə, mərhum ümummilli liderimizin böyüklüyündən, təmkinliliyindən və bağışlaya bilmək kimi yüksək insani keyfiyyətindən, ölkəmizdəki demokratiya və söz azadlığının verdiyi geniş imkanlardan sui-istifadə edərək təhqirə məruz qoyanların bu gün tutduqları yüksək məqamlar əlbəttə cəmiyyətin tərəqqipərvər hissəsinin heysiyyatına toxunur. Hamının tanıdığı mətbu orqanın köşə yazarı olduğu dövrdə yazılarındakı antimilli, antiazərbaycan çıxışlarına görə bütün mediada ad salmışların əxlaqsızlıqlarını işə salaraq yüksək mərtəbələrə çatması xalq-dövlət münasibətləri baxmından çox incə məsələdir.

Ulu öndərin Klivlenddə müalicəsini davam etdirdiyi bir dövrdə "Heydər Əliyevin ölüm xəbərini gətirənə nişan üzüyümü hədiyyə edəcəm" deyən bir ayağı qaloşlu "əxlaq heykəlinin" Ümummilli liderimizin vəfatından sonra zər-ziba içərisində üzməsi, cəmiyyətin "iş qadınrından" birinə çevrilməsi çox maraqlı və düşündürücüdür. "Əxlaq zurnası" ağızlarından düşməyən bu "əxlaq simvollarını" bu mərtəbələrə çatdıranlardadır günah. Harada, hansı və necə göstərdikləri "xidmətlərə" görə bu mərtəbələrə yüksəlmələri məlum olmayan "əxlaq müəllimələrinin" bu gün millətə namus, qeyrət, əxlaq dərsi keçmələri günümüzün paradoksudur.

Keşmişdə dövlətimizin əleyhinə, onun dahi liderinin ünvanına ən təhqiramiz ifadələri işlədənlərin bu gün saraylarda yaşaması, gündə bir bahalı avtomobildən düşməsi və zər-zəba içində üzməsi yerdən qalxan nəsillərə verilən ən pis örnəkdir. Dünən dövləti və onun başçısının söyənlərin konkret məmurlar tərəfindən bu şəkildə "mükafatlandırılması" elə dövətçiliyimizin özülünə onlar tərəfindən endirilmiş ən ağır zərbədir.

Əxlaqlı olaq, əxlaqsızların etdiyi əxlaqsızlığa da göz yummayaq!

Ölkə.Az