Dünyanın 10 ən məşhur azərbaycanlısı

Ölkə.Az saytı dünyanın ən məşhur azərbaycanlılarının siyahısını təqdim edir.

Heydər Əliyev - Müstəqil Azərbaycanın qurucusu hesab olunur. 1923-cü ilin 10 may tarixində Naxçıvanda anadan olub. 1993-2003-cü illərdə Azərbaycan prezidenti olmuş Əliyev 2003-cü ilin 12 dekabrında dünyasını dəyişib.

Rəşid Behbudov - 1915-ci ilin 14 dekabrında Tiflisdə anadan olub. Ailəsi əslən Şuşadan idi. Sosialist Əməyi Qəhərmanı, SSRİ xalq artisti kimi yüksək mükafatlara sahib olan sənətkar 1989-ci ildə dünyasını dəyişib.

Lütfi Zadə - Qeyri-səlis nəzəriyyənin banisidir. Kaliforniyadakı Berkli Universitetinin professoru olan həmyerlimiz 1921ci ildə anadan olub. Onun elmi kəşfləri nəticəsində yüzlərlə texneloji avadanlıqlar istehsal olunub.

Müslüm Maqomayev - 1942-ci ilin 17 avqustunda Bakıda anadan olub. Babası Əbdül Müslüm Maqomayev dövrünün məşhur bəstəkarlarından olub. SSRİ xalq artisti olan Maqomayev 2008-ci ilin 25 oktyabrında dünyasını dəyişib.

Vaqif Mustafazadə - 1940-cı ilin 16 mart tarixində Bakıda anadan olub. Dünya cazının yenilikçilərindən olan həmyerlimiz 1979-cu ildə vəfat edib. Onun etdiyi ən böyük yenilik isə şübhəsiz ki, ilk dəfə caz-muğam sintezini dinləyicilərə təqdim etməsiydi.

Tofiq Bəhramov - Azərbaycan və sovet hakimlik məktəbinin əfsanəsi hesab olunur. 1926-cı ildə anadan olan Bəhramov dünya çempionatı oyunlarını idarə edən ikinci, avrokubok matçlarına çıxan ilk sovet hakimi olub. Əslən Ağcabədi rayonundandır.

Mübariz Mənsimov - "Palmali" şirkətlər qrupunun rəhbəri olmaqla yanaşı, xeyriyyəçidir. Həmçinin "Xəzər Lənkəran" futbol klubunun sahibidir. Məşhur "Forbes" jurnalı həmyerlimizin sərvətinin 1.3 milyard dollar olduğunu yazır. Mənsimov 1968-ci ilin 22 martında Masallıda fəhlə ailəsində doğulub.

Çingiz Abdullayev - Dünyada siyasi detektiv janrının ən parlaq nümayəndələrindən hesab olunur. İndiyə kimi 20 milyondan artıq kitabı satılıb. 1959-cu ildə Bakıda anadan olan yazıçı həm də Yazıçılar Birliyinin katibidir.

İsfar Sarabaski - Azərbaycanın ən gənc bəstəkar və pianoçularındandır. Daha çox beynəlxalq müsabiqə və festivallardakı uğuruyla tanınır. Hazırda cəmi 26 yaşı olsa da, beş ildir Azərbaycanın əməkdar artistidir.

Zabit Səmədov - Azərbaycanın dünya səviyyəsində tanınmış kiqboksçularından biridir. Bir müddət Belarus bayrağı altında çıxış edən Səmədov 1984-cü ildə Gürcüstanın Qardabani rayonunun Candar kəndində anadan olub. "Mauqli" ləqəbiylə də məşhurdu.