Televizora baxmaq böyük günahdır

Son zamanlar maraqlı açıqlamaları ilə gündəm yaradan AMEA-nın Əlyazmalar İnstitutunun əməkdaşı, ilahiyyatçı Əkrəm Həsənov yenidən diqqət mərkəzindədir. Ölkə.Az-ın məlumatına görə, bu dəfə o, televizora baxmağın böyük günah olduğunu bildirib:

"Televizora baxmağa görə qəbr əzabının olacağını bilirdinizmi? Mən bilmirdim. İndicə dinlədiyim çox hörmətli, Mədinədə təhsil alan ilahiyyatçı Adil qardaşımızın dərsində eşitdim. Buyurur ki, bu barədə hədislərdə bir xəbər gəlməyib. Ancaq hansısa şeyxlərdən birinin qohumları dünyasını dəyişir. Şeyx özü deyir ki, bir dəfə onu yuxuda gördüm. Gəlib mənim ayağıma təpik vurur, deyir ki, dur, get bizə və denən ki, evdən televizoru çıxarsınlar. Məndə düşündüm ki, bu yuxudur və məhəl qoymadım. İkinci gün yenə də yuxuda onu gördüm. Gəlib ayağımı təpikləyib dedi ki, sənə demədimmi ki, get bizə, denən televizoru evdən yığışdırsınlar, axı mənə əzab verilir. Mən gözləmədikləri vaxtda onlara getdim. Gördüm ki, televizora gözlərini zilləyib baxırlar. Onlara yaxınlaşıb dedim ki, siz istəyərsinizmi atanıza əzab verilsin. Sonra gördüyüm yuxunu olduğu kimi onlara danışdım. Onlar hamısı ağlamağa başladılar. Böyük oğlan isə qalxaraq televizoru evdən çıxarıb atdı. Sonra evə gəldim, gecə yuxumda həmin şəxsi növbəti dəfə gördüm. Mənə dedi ki, Allah səni xilas etsin. Sən məni xilas etdiyin kimi. Sübhanallah".

İlahiyyatçı hesab edir ki, bir şəxsin televizora baxması öz övladının üzərinə benzin töküb yandırmasından daha pisdir:

"Alimlər deyirlər ki, valideynin öz övladının üzərinə benzin töküb yandırması evə televizor gətirməsindən yaxşıdır. Allah təala bizim hamımızın günahlarımızı bağışlasın! Amin! Həqiqətən də məsələ çox ciddidir".