"Azərbaycana qarşı digər dövlətlərin qısqanclığı, daha çox özünü biruzə verəcək”
Ülkər Musazadə: “Əfsuslar olsun ki, dillərə dastan olacaq Birinci Avropa Oyunlarından danışıldıqca,Azərbaycana qarşı digər dövlətlərin qısqanclığı, daha çox özünü biruzə verəcək”
Müsahibimiz Dövlətlərarası Media və Diplomatiya Mərkəzinin (İMD centerin) rəhbəri, siyasi yazar Ülkər Musazadədir. Ölkə.Az həmin müsahibəni təqdim edir.
-Ülkər xanım, bu gün hər kəs rəhbərlik etdiyiniz İMD center-in (İntergovernmental Media & Diplomatic Center) Azərbaycan mətbuatında və siyasi arenada gördüyü, eyni zamanda görəcəyi işlərlə maraqlanır. Sizcə bu gün Azərbaycanda İMD centerin yaranmasına həqiqətən də ehtiyac var idimi?
- Maraqlı sualdır. Qısa olaraq deyim ki, bəli bu gün Azərbaycan mətbuatı və siyasi arenada İMD centerin yaradılması mütləq idi. Ən azından ona görə ki, buna yaşadığımız mühit və qlobal dünyada baş verən hadisələr səbəb oldu. Azərbaycan hazırda müharibə şəraitində yaşayır. Bir milyondan artıq qaçqın və köçkünlərimiz, işğal altında olan torpaqlarımız , BMT-nin qətnamələrini hələ də yerinə yetirməyən düşmənimiz var. Məhz buna görə də, Azərbaycan bütün gücündən istifadə edib geniş və ciddi təbliğat aparmalıdır. Təbliğatı təkcə olkə daxilində deyil ,həmçinin beynəlxalq arenada aparmaq mütləq şərtdir. Biz səsimizi yetərincə boyuk tribunalardan dünyaya çatdırmağa çalışırıq. Bunun üçün həm dovlət həm də fərdi şəkildə bir sıra uğurlu addımlar atmışıq. Avropa oyunları isə buna əyani sübutdur. Biz oz gücümüzü dünya qarşısında bir daha bəyan edirik. Lakin gücümüzün daimiliyini qorumaq baxımından mediamızın doğru şəkildə inkişafı və bu inkişafın dünya birliyi tərəfindən tanınması da ən azı olkədə baş verən mühim hadisələr kimi mütləq əhəmiyyət kəsb edir.
İMD centerin isə boynuna götürdüyü missiya məhz dünya ölkələri arasında bu təbliğatın gücləndirilməsindən ibarətdir. Hesab edirəm ki, dünya ölkələrinə Azərbaycan həqiqətlərinin çatdırılmasında ən uğurlu yol, mətbuatdır. Ona görə də, İMD center fəaliyyət göstərdiyi bir ildən artıq zaman kəsiyində bir çox ölkələrin mətbuatı ilə əməkdaşlıq etməyə müvəffəq olub. Bu gün, İMD center bir çox xarici ölkələrin mediası ilə körpü yaradıb: Pakistan Azərbaycan Media Forumu kimi önəmli bir layihə icra edib. Onu da deyim ki, bu layihənin ilk könüllü fəxri üzvü Pakistanın eks Xarixi işlər naziri Əkrəm Zəki olub. Daha sonra biz Qazaxıstan- Azərbaycan , Gürcüstan - Azərbaycan, Rusiya- Azərbaycan, Litva - Azərbaycan, İsrail- Azərbaycan, Küveyt - Azərbaycan Media Forumlarını yaratmışıq. Həmçinin bir çox dövlətlərlə bu gün də əməkdaşlıqla bağlı danışıqlar aparırıq. Bizim başlıca hədəfimiz bu media körpülərinin sayını artırmaqdır. İMD centerin əsas hədəfi dünya mediası üzərində aparılan bu təbliğat sayəsində Xocalı soyqrımının 25 illliyinə qədər BMT nin qəbul etdiyi, lakin ermənilər tərəfindən bu günə qədər yerinə yetirilməyən qətnamələrin birini qəbul etdirməkdir. Əgər İMD center Şuşanın işağlı günü Gürcüstanda ermənilər tərəfindən təşkil edilən “Şuşanın azad olunması”na dair konsert proqramının keçirilməsinə mane ola bilirsə, qondarma erməni soyqrımının 100 illiyi ilə bağlı əməkdaşlıq etdiyimiz bütün ölkələrin mətbuatı üzərindən ermənilərə qarşı etiraz aksiyası aparmaq gücünə malikdirsə, əminəm ki, biz bunu da edə biləcəyik.
- Sizcə İMD center-i Azərbaycan mətbuatında bir yenilik kimi qiymətləndirmək olarmı?
- Deməzdim bu yenilikdir. Bu əslində mediya və siyasətin sintezi olaraq, Azərbaycanı xaricdə təbliğatı funksiyasını yerinə yetirən bir mərkəzdir. Azərbaycanın bir sıra qələm əhlinin yazılarının xarici mətbuatda dərc olunması danılmazdır. Lakin bilirsiz, bir var ki, “mən xarici mətbuatda məqalə dərc etdim” deyib keçmək, bir də var mən xarici mətbuatda, Azərbaycanın siyasi maraqları çərçivəsində, həqiqətləri dürüstcə dərc edə bildim” demək. Bunlar arasında böyük fərq var. Bu gün dünya mətbuatı dövlətlərin siyasi mövqeyi və xaricdə həmin dövlətin təbliğatı üzərində qurulub. Azərbaycanın isə xaricdə təbliğatı aparılıır. Amma bir az əvvəl də qeyd etdim ki, bu təbliğat yetərli deyil. İMD center isə bu təbliğatı məhz mətbuat üzərindən gücləndirməyi qarşısına məqsəd qoyub.
- Siyasi motivlərə köklənmişkən, maraqlı olardı, dünya ölkləri ilk Avropa Oyunlarının Azərbaycanda keçirilməsi ilə bağlı nə düşünür? Yəni, əməkdaşlıq etdiyiniz ölkələrdə bu mövqe özünü biruzə verirmi?
- İlk Avropa Oyunlarının Azərbaycanda keçirilməsi olduqca qürurverici bir haldır. Azərbaycan kiçik bir dövlətdir. 70 il Azərbaycan Sovet dövrünü keçmiş bir dövlətin yüksək səviyyədə Avropa oyunlarına ev sahibliyi etməsi, böyük və danılmaz bir uğurdur. Bilirsiz, mən hələ Avropa oyunları başlamazdan əvvəl, bir Litvalı deputat, hətta deyərdim Litvanı Avropa Asanbleyasında təmsil edən yetərincə nüfuzlu bir deputat olan Baris Tsilaviçlə söhbət edirdim. Söhbət əsnasında ona bir sual verdim ki, Azərbaycanın Avropa Oyunlarına ev sahibliyi etməsinə necə baxırsız? Suala cavabı olduqca türk demişkən interesan idi. Dedi ki, məni üzrlü hesab edin, amma mən Azərbaycanı tərifləməyəcəyəm. Buradan o qənaətə gəlmək olur ki, Avropa Oyunlarının yüksək səviyyədə Azərbaycanda keçirilməsi 70 il Sovet dönəmini keçmiş digər dövlətlərdə qısqanclıq hissi yaradır. Əfsuslar olsun ki, dillərə dastan olacaq Birinci Avropa Oyunlarından danışıldıqca, Azərbaycana qarşı gözlə görüləcək qədər digər dövlətlərin qısqanclığı daha çox özünü biruzə verəcək.
-Avropa oyunları ərəfəsində Ermənistanda “İşıq inqilabı”nın baş qaldırması sizcə nədən qaynaqlanır?
-Bəli, çox düzgün vurğuladınız. Məhz Avropa Oyunları ərəfəsində Ermənistanda “işıq inqilabı” adı altında keçirilən aramsız mitinq və çatışmalar onu sübut edir ki, ermənilər Avropa Oyunlarına ev sahibliyi edən Azərbaycanda xalqın necə yaşadığının şahidi oldu. Ermənilər dünya ölkələrinin nümayəndələrinin Azərbaycana axınını müşahidə etdi. Bu mütləq sürətdə özünü biruzə verdi. Amma demək olmaz ki, Ermənistandakı çaxnaşmalar məhz Avropa Oyunlarına görədir. Ermənistanın siyasi analitiki Saro Saroyan öz məqaləsində qeyd edir ki, “Ermənistanda vətəndaş müharibələri artıq uzun illərdir siyasi prosesin tərkib hissəsidir”. Yəni bunu erməninin özü belə etiraf edir ki, Ermənistanda vətəndaş müharibəsi ilərdir davam edir. Bu faktdır. Ermənistan forpost bir dövlətdir. İşğalçı bir dövlət olduğundan öz xalqını təcrid olunmuş və acınacaqlı şəraitdə yaşamağa məcbur edir. Bu gün Ermənistanda baş qaldıran “işıq inqilabı” məhz harınlamış erməni dövlətinin öz xalqına verdiyi zülmün nümayişidir. Əgər 30-40 min erməni dayanmadan bu etirazı davam etdirərsə, Ermənistanda Avromaydan təkararlana bilər. Əslində bu Qərbin siyasi manevri üçün də, əlverişli şərait yaradır.
- Ermənistanda baş qaldıran “işıq inqilabı” zamanı 250-dən artıq aksiyaçı həbs edildi, çox sayda insanların hüququları pozuldu, bir çoxlarına polislər tərəfindən fiziki xəsarət yetirildi, amma hər dəfə insan hüquqlarının pozulmasından yana ağzı dolusu danışan Avropa Birliyi nədənsə bütün bunları görməzdən gəldi. Sizcə bu Avropa Birliyinin ikili standartlara əsaslanan siyasi mövqeyindən xəbər vermirmi?
- Əlbəttə. Avropa Birliyi elə bir siyasi yolu seçib ki, o ikili standartlara əsaslanan mövqe tutmaq sorundadır. Lakin bilirsiz, hər məsələyə bir qədər başqa yöndən yanaşmaq lazımdır. Axı forpost Ermənistanda yaxşı nə var ki? Avropa Birliyi və ABŞ hər zaman sürətlə inkişaf edən ölkələri hədəfə alır. Unutmamalıyıq ki, Azərbaycan da, məhz sürətlə inkişaf edən dövlətlərdəndir. Ona görə də, sürəkli insan haqlarının pozulmasından danışırlar, həbslərdən və ya daha nələrdən. Bu siyasətin bir oyunudur. Ermənistan forpostkən, orada artıq insan hüquqları ilə yanaşı bir dövlətin suverenliyi tapdanmış deməkdir. Axı Avropa Birliyi bunun nəyindən danışsın?
- ATƏT-in Azərbaycan bürosunun bağlanması sizcə nə ilə bağlı idi?
-Hesab edirəm, dövlət rəsmiləri buna yetəri qədər konkret cavab veriblər. Bir çoxları ATƏT-in fəaliyyətini qınaq obyektinə tutur və elə anlayırlar ki, ATƏT məhz Dağlıq Qarabağı bizim əvəzimizə işğaldan xilas edəcək. Bu tamamilə yanlış fikirdir. Etiraf edək ki, ATƏT illərdir mövcud olan Dağlıq Qarabağ münaqişəsinin həlli ilə bağlı bütün gücündən istifadə etməyib. Lakin hesab edirəm ki, burada ATƏT-in həmsədri olan dövlətlərin siyasi mövqeyi öz təsirini göstərirdi. Bütün bunlara rəğmən ATƏT-in ofisi Bakıda 12 il fəaliyyət göstərib və bu müddət ərzində Azərbaycanda çoxlu sayda müsbət dəyişikliklər olub. Azərbaycan forpost Ermənistandan fərqli olaraq, öz qərarlarını özü verir. Ona görə də, zamanı çatanda istədiyi qurumun fəaliyyətini dayandırmaq üçün məhz özü söz sahibidir. Həm də, ATƏT-də çox ciddi problemlər mövcuddur və onun görəcəyi işlər çoxdur. Bu problemlərin həll olunmaması təşkilatın fəaliyyətini sual altında qoya bilər. Ona görə də, hakimiyyət həmişə olduğu kimi yerində və zamanında doğru qərar verdi.
Ölkə.Az
