\"Periscope\"a üsyan edən azərbaycanlı oğlana BBC vasitəsilə cavab: \"Kişilər soyunmağımı istəyir...\"

"Periscope"a qarşı üsyan edən gəncin videosu interneti partladıb

Ölkə.Az xəbər verir ki,"BBC.com"da yer alan xəbərə görə, "Periscope" tətbiqetməsi haqqında tənqidi fikirlər səsləndirən azərbaycanlı aktyor Elnur Muradov sosial şəbəkələrdə əsl ulduza çevrilib. Onu dəstəkləyənlər də, əleyhinə olanlar da tapıldı. Muradovla razılaşmayanların böyük əksəriyyəti qızlar və qadınlar idi. Bu isə onun hazırladığı videoda tənqid hədəfi olaraq əsasən qadınları seçməsi ilə əlaqədar olub.

Onun fikrincə, "Periscope" və digər texnoloji yeniliklər qızların həyatını məhv edir. O, valideynləri qızlarına nəzarət etməməkdə və bunun gələcəkdə çox acı nəticələrə gətirə biləcəyindən gileylənir.

"Buna görə də hər gün boşanma xəbərləri eşidirik. Valideynlər "iPhone"u alıb verirlər uşağın əlinə, o da başqa nə edəcək? Pis-pis şeylərlə məşğul olmağa başlayır. Azərbaycan çox bərbad gündədir", - deyə Muradov videoda bildirib.

Təqribən 50 min istifadəçi qısa müddət ərzində həmin videomüraciəti izləyib və onu Azərbaycanda trendə çevirib.

Günel Əsgərzadə adlı gənc qadın bu videonu görəndən sonra öz narazılığını ifadə edib. O bildirib ki, makiyaj etmədən yalnız iki körpəsi ilə olan həyatını dostlarına göstərmək üçün "Perisope"dan istifadə edir.

"Problem qadınlarda deyil, problem kişilərdədir. Hər kəs görür ki, mənim iki uşağım var, ancaq bəzi kişilər görüş təklifi edir və ya soyunmağımı istəyir. Burada qadınları günahlandırmaq doğru olmazdı", - deyə Əsgərzadə bildirib.

"Birincisi, insanların ifadə azadlığı var, getmisən, di gəl bunu hələ qanmamısan. İkincisi, ... Qızlar əzilir, azad ola bilmirlər. Amma sənin kimi axmaqlar gedir və bir sm də dəyişmirlər", - deyə gənc qadın qeyd edib.

Onun bu fikrini çoxları bəyənib.

Bir çox qadınlar Muradovun bu ittihamlarını əsassız adlandırıb. Ancaq onu dəstəkləyənlərin sayı heç də az deyil.

Xatırladaq ki, "Periscope" olduğunuz yeri və ya əlamətdar bir hadisəni başqaları ilə canlı şəkildə paylaşmağınıza imkan yaradan proqramdır. iOS və Android əməliyat sistemləri ilə çalışan ağıllı cihazlarda istifadə edilə bilinir.

"Periscope" istifadə etmək üçün iOS 7.1 və yuxarı, Android 4.4 və yuxarı versiyalara malik cihaza sahib olmağınız lazımdır. Bu tətbiqetmə sosial medianın yeni ulduzu sayılır.

Ölkə.Az