Yeni araşdırma: Neptun və Uranın əsl rəngləri bəlli oldu

Alimlər yeni bir araşdırma ilə Neptun və Uranın yaşılımtıl mavinin oxşar çalarları olduğunu aşkar ediblər.

Publika.az xəbər verir ki, Britaniya astronomlarının apardığı araşdırma Neptun və Uran planetlərinin rəngləri ilə bağlı fikirlərimizin yanlış olduğunu üzə çıxarıb.

1980-ci illərdə aparılan bir kosmos araşdırmasından əldə edilən görüntülər Neptunun tünd mavi, Uranın isə yaşıl olduğunu göstərib. Ancaq bu araşdırma hər iki planetin yaşılımtıl mavinin oxşar çalarları olduğunu aşkar edib. Məlum olub ki, Neptunun əvvəlki şəkilləri planetin atmosferinin təfərrüatlarını göstərmək üçün təkmilləşdirilib və onun həqiqi rəngini dəyişib.

Edinburq Universitetinin astrofizika professoru Ketrin Heymans bildirib ki, Neptunun atmosferində görə biləcəyiniz xüsusiyyətləri ortaya çıxarmaq üçün mavi rəngi önə çıxarılıb:

“Buna görə də olduqca mavi görünür, lakin əslində Neptun Urana çox bənzəyir. Astronomlar çoxdan bilirlər ki, müasir təsvirlərin əksəriyyəti iki planetin həqiqi rənglərini dəqiq əks etdirmir”.