Tiranozavrlar primatlar qədər ağıllı deyilmiş - Yeni araşdırma

Almaniyanın Heynrix Heqne Universitetinin mütəxəssislərinin rəhbərlik etdiyi beynəlxalq alimlər qrupu tiranozavrların intellektual qabiliyyətlərini tədqiq edib. Onların tapıntıları nəhəng yırtıcı kərtənkələnin primatlar qədər ağıllı olduğuna dair Braziliyadan olan nevroloqların əvvəlki fərziyyəsini təkzib edib. 

"Ölkə.az" xəbər verir ki, tədqiqat "The Anatomical Record" (TAR) elmi jurnalında dərc olunub.

Uzun müddət nəsli kəsilmiş heyvanların beyin biologiyasını öyrənmək üçün zooloqlar endokastlardan - kəllə fosillərinin tökmələrindən istifadə ediblər. Onlar bizə kəllə sümüyünün nisbi ölçüsünü və bir vaxtlar orada olan toxuma nisbətini təxmin etməyə imkan verir.

Müasir alliqatorlarda və timsahlarda beyin kəllə boşluğunun yalnız 30%-ni tutur, quşlarda və məməlilərdə isə bu rəqəm 100%-ə yaxındır.

Əldə edilən məlumatlar əsasında alimlər hesablayıblar ki, tiranozavr reksinin beynində 250 milyondan 1,7 milyarda qədər neyron var bə bu da canlı timsahların neyronlarının sayına uyğundur.

Əvvəlki bir araşdırma, "Tyrannosaurus rex"in neyron sıxlığının 3,3 milyard olduğunu təxmin edib ki, bu da babunların beyninə bənzəyir. Komanda qeyd edib ki, braziliyalı həmkarları yırtıcı heyvanın beyninin bütün endokranial boşluğu tutduğunu irəli sürərək hesablama səhvinə yol veriblər.

Alimlər qeyd ediblər ki, onların nəticələri tiranozavrların axmaq olması demək deyil. Neyronların sayı və beyin ölçüsü heyvanlar arasında çox dəyişir, lakin bu, həmişə zəka ilə əlaqəli deyil. Məsələn, göyərçinlər kiçik beyinləri ilə meymunlar kimi saya bilirlər.

Tədqiqatçılar vurğulayıb ki, öz dövrləri üçün tiranozavrlar çox güman inkişaf etmiş yırtıcılar olublar.(Qaynarinfo)