\"Whatsapp\" istifadəçiləri üçün vacib xəbər

"Whatsapp" hesabınızı yeniləməniz haqda daxil olan mesaja daxil olmayın

Ölkə.az xəbər verir ki, "Whatsapp" messencer istifadəçiləri plastik kart saxtakarlarının yenidən hədəfi olub. Bəs bu cür fırıldaqçılardan necə qoruna bilərik?

Hazırda çox sayda istifadəçini tələyə sala bilmiş fırıldaqçılar sizə "Whatsapp" hesabınızı yeniləməniz haqda mesaj göndərirlər. Ancaq bu mesaj əslində sizə qurulmuş tələdir. Mesaj içərisindəki keçid "Whatsapp.com" şəklində görünsə də kliklədikdə başqa bir domenə keçir. Bunun səbəbi saxtakarların veb saytın gerçək adını HTML kodunda gizlətmiş olmasıdır.

Keçidə kliklədikdə isə plastik kart (bank kartı) məlumatlarınızın daxil edilməsi istənilən saxta bir səhifə açılır. Hesabınızı yenilənməyə yönəlik bir səhifə kimi görünsə də əslində bu sizin kart hesablınızın fırıldaqçıların əlinə keçməsinə səbəb olur.

Fırıldaqçıların göndərdikləri bu mesaj hazırda sadəcə ingilis dilində göndərilir və tərcüməsi belədir: "Diqqət! "Whatsapp" messencer hesabınızın vaxtı bitir".

Bu cür bir mesaj aldıqda isə keçidə (link) klikləmədən mesajı silin.

Onu da qeyd edək ki, "Whatsapp" administratorları istifadəçilərinə mesaj yolu ilə hər hansı bir xəbərdarlıq göndərmir və açıqlamalarını rəsmi bloq vasitəsilə edirlər.