Köklükdən utanmaqdansa, arıqlayın!

“Arıqlama problemi çoxları üçün aktualdır. Artıq çəki təkcə sağlamlıq problemi deyil, eyni zamanda heysiyyətini aşağılayır. Əksəriyyət müxtəlif üsullarla, pəhrizlərlə məqsədlərinə çatmağa çalışırlar. Amma sərf edilən vaxt, zəhmət çox vaxt gözlənilən effekti vermir, tərəzi əvvəlki rəqəmləri göstərir, onların əsəblərini, əhval- ruhiyyəsini pozur, bəzən depressiyaya qədər gətirib çıxarır. Ona görə də, həqiqətən arıqlamaq, gözəl formaya sahib olmaq üçün təkcə pəhriz dövründə deyil, həmişəlik öz həyat tərzlərini dəyişməlidirlər”.

Ölkə.Az xəbər verir ki, bunu həkim-onkoloq Arif Nuri “Qafqazinfo”ya açıqlamasında bildirib.

Onun sözlərinə görə, arıq bədənə sahib olmaq üçün elə pəhriz növü, fiziki hərəkətlər növü seçilməlidir ki, bezdirici olmasın, bütün ömür boyu istifadəyə yararlı olsun, bezdirməsin, hər gün insana yaxşı- əhval ruhiyyə gətirsin, sağlamlığa zərərli olmasın: “Ona görə də, qəti qərara gəlmək lazımdır, məqsəd hansısa zaman kəsiyində müəyyən qədər arıqlamaq yox, bütün ömür boyu gözəl formaya, qırışsız, təravətli dəriyə və sağlam orqanizmə malik olmaq olmalıdır. Bundan başqa bu həyat tərzi sizə hər gün yüksək əhval- ruhiyyə, sevinc bəxş etməlidir. Beyninizdə iki obraz canlandırın: biri gözəl formalı, təravətli dəriyə, sağlam orqanizmə sahib, gümrah birisi, digər artıq çəkili, güclə təngnəfəs yeriyən, şəkərli diabet, ürək problemli, oynaqlarında ağrıdan gecə səhərə qədər yata bilməyən, ətrafdakı əks cinsin diqqətini cəlb etməyən birisi. Qəbul edin ki, başqa variant yoxdur. Seçim öz əlinizdədir”.

A. Nuri qeyd edib ki, 5 məsləhətə riayət etməklə artıq çəkilərdən xilas olmaq olar: “Hər bir məsləhətə ayrılıqda əməl etmək lazımdır, o zaman istəyimizə çata bilərik.

Birinci addım

Kimdəsə artıq çəki problemi uşaq dünyaya gətirəndən sonra yaranıb, kimsə qarşıdan gələn isti fəsillərə qədər özünü formaya gətirmək istəyir. Bütün bunlar o deməkdir ki, orqanizmdə artıq piylənmə prosesi başlayıb, orqanizm çəkiyığma proqramı işə düşüb. Bu halda qısamüddətli pəhriz proqramları kömək etməyəcək. Belə vəziyyətdə başa düşmək lazımdır ki, hansı səbəblər bu vəziyyətə gətirib çıxarıb və bu səbəbləri öz həyatınızdan çıxarmalısınız. Əlbəttə, burda qeyd etmək lazımdır ki, bu həyatınızda bəzi məhdudiyyətlərə gətirib çıxaracaq. Bu zaman özünüz qərar verməlisiniz: sizin üçün yuxarıda qeyd etdiyimiz hansı obraz daha vacibdir, dadlı yemək və divanda uzanıb seriala baxmaq, ya rasionundan bəzi qida məhsullarını çıxarıb, daha aktiv, energetik həyat tərzi və həyatdan ləzzət almaq, ətrafdakıların daimi diqqətində olmaq. 
Qəti verilmiş qərar uğurun yarısıdır, indi o qərarın həyata keçirilməsinə başlamaq lazımdır. Birinci növbədə öz rasionunuzdan bütün çörək-bulku məmulatlarını, şirniyyat, konfet- tort məhsullarını, ümumiyyətlə bütün un məhsullarını çıxarmalısınız. Başqa heç bir şey etməyin, yəni əvvəlki həyat tərzinə davam edin. Hər həftə sonu tərəzində sizə sevinc gətirəcək rəqəmlər görəcəyinizə əmin olun. Bu cür 3 həftə ərzində davam edin, sonra 2-ci addımı atın.

İkinci addım

Artıq çəki ilə mübarizədə ən böyük düşmənlərdən biri gecə yemək yeməkdir, buna görə də dadlı və həcmli şam yeməyindən imtina etmək lazım olacaq. Nəticəyə çatmaq üçün birdəfəlik qərar qəbul etmək lazımdır ki, axşam saat 6-dan sonra yemək yeməyəcəyəm. Amma onu da unutmaq lazım deyil ki, özünüzə kəskin sərhədlər də qoymamalısınız. Ona görə də, əgər çox yemək istəyirsinizsə, şirin olmayan meyvələrdən yeyə bilərsiniz, bir stəkan qatıq içə bilərsiniz. Adi su içməyi də unutmayın. Həmçinin axşamlar sevimli fiziki hərəkətlərinizi unutmayın. Səhərlər isə tərzi sizin ürəyiniz istəyən rəqəmləri görəcəksiniz. 3-cü addıma keçmək üçün 3 həftə vaxtınız var.

Üçüncü addım

3-cü addım qidalanma və onun tərkib hissələrinə xüsusi fikir verməyə keçirik. Bu zaman fiziki hərəkətləri də unutmuruq. Bunlar arıqlama proqramının əsas tərkib hissəsidir. Acmaq, özünü kəskin məhdudlaşdırmaq olmaz, unutmayın ki, arıqlama prosesi həzlə olmalıdır. Onda, bu proses həqiqətən həyat tərzinə keçə və sizə gözəl nəticələr gətirə bilər. 
Birinci növbədə rasionda olan bütün yüksəkkalorili məhsulları daha azkalorili məhsullarla əvəz edirik. Məsələn, üzərində ağ piy olan bütün ətlərdən imtina edirik, yalnız qırmızı ət yeyirik. Daha sonra piyli ətləri toyuq əti (dərisiz) və balıqla əvəz edirik. Mayonezi zeytun yağı və ona əlavə edilmiş az miqdarda limon şirəsi ilə əvəz edə bilərsiniz. Yağlı və qızardılmış yeməkləri daha faydalı və dadlı yeməklər ilə əvəz edin. Arıqlamanın ən yaxşı və vacib amillərindən olan təmiz suyu da unutmayın. Gün ərzində 2 litr təmiz su içməlisiniz, bu zaman çay və kofe nəzərə alınmır. Ətə, yağlı məhsullara xərclədiyiniz pulu müxtəlif meyvələrə, tərəvəzlərə sərf edin. Müxtəlif desertlər, salatlar hazırlayıb yeyin. Bu sizin arıqlama prosesini diskomfortluqdan daha çox müxtəlifliyə səbəb olacaq, maraqlı yemək növlərini ilə sizi tanış edəcək, yeməyiniz daha faydalı olacaq. 4-cü addımı atmaq üçün də 3 həftə bu qaydalara əməl etməniz lazım olacaq.

Dördüncü addım

Özünüz üçün dadlı və faydalı yemək hazırlayanda özünüzün şəxsi boşqablarınıza xüsusi diqqət yetirməlisiniz. Bu öz şüuraltınızı aldatmaq üçün möcüzəli bir üsuldur. Bunun üçün özünüzə kiçik, bəzəkli, güllü boşqablar seçin, hansılar ki, əvvəlki qablarınızın yarısı həcmində olacaqlar. Bu prosesə 3 həftə sərf etdikdən sonra tərəzi sizin ən gözəl dostunuz olacaq .

Beşinci addım

Əgər siz beşinci addıma gəlib çıxdınızsa, sizi gözəl fiqura münasibətilə təbrik edirəm. Sizin formanız təkcə özünüzün deyil, həmçinin ətrafdakıların gözünü oxşayır. Amma bu anda sizin iştahanız bir az da artıq siz daha ideal formaya sahib olmaq istəyirsiniz. Bu mərhələdə sizin ideal formaya sahib olmağınıza xüsusi fiziki hərəkətlər kömək olacaq. Bura da qeyd etmək istəyirik ki, özünüzə elə optimal fiziki çalışmalar kompleksi, bunun üçün elə zaman seçəsiniz ki, bu işi həzlə görə biləsiniz.

Nəticə

Bu məqsəd üçün ən yaxşı variantlardan biri iplə tullanma (“skakalka”) və həlqə fırlatmadır. İplə tullanma üçün orqanizm çoxlu enerji sərf edir, bütün əzələlər tonusda olur. Həlqə fırlatma isə bud və taliyi korrektə etməyə kömək edir. Bunun üçün əla variantlardan biri fitnes və bodifleks üzrə video kurslarıdır. Bu kursların özünüz üçün olan optimal variantını seçməlisiniz. Bununla yanaşı gün ərzində 30 dəqiqəlik təmiz havada idman yerişi (asta qaçışla da əvəz etmək olar) də çox faydalıdır. Qulaqcıqla ürəyinizi oxşayan ritmik musiqini dinləməyi də unutmayın. Çox faydalı digər əlavə hovuzda üzmək ola bilər.

Faldalı və dadlı rasion, fitnes və idman, yaxşı əhval- ruhiyyə sizin məqsədinizə çatmağınızı tez və asan edəcək. Belə pəhriz sizə həzz bəxş etməklə, sağlam orqanizmə sahib olmağınızla bərabər həm də, gözəl görünüşə sahib olmağınıza kömək edəcək. Tərəzinin göstəriciləri ürəyiniz istədiyi rəqəmlərə çatacaq, güzgüdə isə gözəl, yaraşıqlı və cavan xanım görəcəksiniz.

Sizdən bu prosesə başlamaq və əmin olmaq lazımdır ki, məqsədinizə çatmaqda həzlə arıqlamaq ən asan, xoşagələn və tez üsuldur”.