Dünyanın dağılacağını bildilər

Bu anbarda dünyanın gələcəyi mühafizə olunur. Arktikada, Norveçin Şpitsbergen adasında fəaliyyət göstərən qiyamət anbarının yeni görüntüləri yayımlanıb. Media nümayəndələrinin nadir halda buraxıldığı ərazidə dünyanın dörd bir yanından gətirilən bitki toxumları qorunur.

Əsası bir neçə il öncə rəsmi səviyyədə qoyulan qlobal toxum anbarı qlobal istiləşmənin və regional müharibələrin səbəb olduğu fəsadlara, ən pis halda isə dünyanın sonuna hesablanıb. Buzlaqlar arasında 130 metr dərinlikdə yaradılan anbarın bütün inşaat xərcini Norveç hökuməti öz üzərinə götürmüşdü. İndi həmin anbarda müxtəlif növdən olan bitkilər fərqli-fərqli sortları əhatə edən milyonlarla toxum mühafizə olunur. Bir gün yer kürəsindəki bütün floranın məhv olacağı təqdirdə, bu anbardakı toxumlar becəriləcək və bəşəriyyət tamamilə məhv olmaqdan xilas olacaq. Bir sözlə, qiyamət anbarı müasir dövrdə “Nuhun gəmisidir”. ..

Hətta Suriyada vətəndaş müharibəsi başlayan andan bu ölkədəki bitkilərin toxumları da qiyamət anbarına daşınıb.

Onu da qeyd edək ki, qiyamət anbarını inşa edənlər onu istənilən təbii fəlakətdən sığortalayıb. Bu anbarın divarları hətta intensiv atom bombası zərbələrinə də davam gətirməyə qadirdir. Toxumların qorunmasına gəlincə, işçilər burdakı şəraitin mühafizə olunan əksər toxumun 4 min il məhv olmadan qalmasını təmin etdiyini deyir. Dünyada cərəyan edən hadisələr onu göstərir ki, bu cür anbarın fəaliyyətə başlaması məqsədyönlü addımdır. Yaxın şərqdə ərazilər durmadan səhralaşır, Filippində hər şeyi yuyub-aparan güclü sel də insanları gələcək üçün düşünməyə vadar edir. Gələcəkdə qida təminatını sığortalamaq üçün bu cür anbarın yaradılması həyati əhəmiyyət kəsb edir. (atv.az)

Ölkə.Az