Yaponiyada ofis kresloları ilə yarışlar keçirilib - Qalibə qəribə hədiyyə
Ölkə.Az xəbər verir ki, ilk belə yarış hələ 2009-cu ildə Kiotoda təşkil olunub. Tədbirin təşkilatçısı Tsuyosi Tahara gündəlik əşyalara əsaslanan idman növü yaratmaq istəyib. O vaxtdan bəri "ISU-1 Qran-prisi" ölkənin müxtəlif şəhərlərində keçirilir və yarışın əsas iştirakçıları ofis əməkdaşları olur.
Üç nəfərdən ibarət komandalar bağlanmış küçələrdə xüsusi hazırlanmış tras üzrə adi kreslolarda mübarizə aparırlar. Yarış iki saat davam edir və ən çox məsafə qət edən komanda qalib gəlir. Mükafat olaraq 90 kiloqram düyü təqdim edilir.
Təşkilatçılar qeyd edirlər ki, bu yarışlar bir çox cəhətdən "Le-Man 24 saat" və "Formula-1" kimi ciddi avtomobil yarışlarını xatırladır: burada dəqiq müəyyən edilmiş tras, pilotların dəyişdirilməsi, vaxt məhdudiyyəti və komanda strategiyası mövcuddur.
