Donuz qripi nədir və ondan necə qorunmalı?

Qışın gəlməsi ilə əlaqədar qrip virusu da tüğyan etməyə başlayıb.

Dünyanın bir çox ölkələrində bu xəstəliyin ağırlaşdığı onlarla insan dünyasını dəyişib. Heyvan mənşəli olan bu virusun hazırda ən yayılmış növü donuz qripidir. Gəlin görək bu xəstəlik haqda nə bilirik, əlamətləri və ondan qorunmaq yolları nədir. Qrip virusu insan üçün nə ilə təhlükəlidir, H1N1 virusuna yoluxmamaq üçün nə etməli? Bu və diğər məsləhətləri bu materialımzda öyrənə bilərsiniz.

Ölkə.az sizə donuz qripi haqda maraqlı materialı təqdim edir.

Donuz qripinin əlamətləri aşağıdakılardır:

yüksək hərarət (bütün xəstələrdə müşahidə olunmaya bilər);
öskürək;
boğazda ağrı;
burun tutulması və ya axması;
baş ağrısı;
bədəndə ağrılar;
titrəmə;
halsızlıq;
bəzən ishal və qusma;

Donuz qripinə tutulduqda nə etməli?

Bu əlamətlərdən biri və ya bir neçəsinə rast gəlindikdə dərhal həkimə müraciət edilməlidir, mümkün olduğu qədər çölə çıxmaqdan və insanlarla kontaktdan çəkinilməlidir.

Evdən çıxmaq lazım gələrsə, mütləq maskalardan istifadə olunmalıdır. Öskürək və asqırma zamanı isə ağız və burunu dəsmalla tutmaq, əlləri tez-tez yumaq da vacibdir.

Donuz qripinin fəsadları:

Donuz qripinin ən geniş yayılmış fəsadlarından biri sətəlcəmdir. Bu zaman xəstənin vəziyyəti kəskin pisləşir və artıq bir sutkadan sonra nəfəsalmada ciddi çətinliklər yaranır. Məhz buna görə daha kəskin ağırlaşmalar baş verməməsi üçün həkimə tez bir zamanda müraciət olunması tövsiyyə olunur.

Donuz qripinin müalicəsi

Donuz qripinin müalicəsi bu növdən olan diğər xəstəliklərin müalicəsindən çox az fərqlənir. Bu ilk öncə yalnız həkimin yazdığı virus əleyhinə olan preparatların qəbulundan ibarətdir. Həmçinin ağrıları yüngülləşdirən preparatlardan da istifadə olunur. Dəqiq müalicə zamanı qaydaya görə donuz qripinə yoluxmuş insanların sağalması risk faktorunun olmaması hallarında 2 həftəyə mümkündür. Mütəxəssislərin sözlərinə görə yaşlıların, hamilə qadınların, körpə uşaqların və zəif immunitetə malik insanların H1N1 virusuna yoluxma riski daha yüksəkdir.

Donuz qripi zamanı qidalanma

Qripə yoluxan insanların qida rasionu da dəyişməlidir. Belə ki, qripə yoluxan insanlara darçın, mixək, zəncəfil, hil, nanə və kəklikotu ilə dəmlənmiş isti çay, zoğal, moruq və böyürtkən mürəbbələrindən istifadə etmək məsləhət görülür. Qripə yoluxmuş insanlara çiy soğan və sarımsaq, əsasən də sıyıq yemək məsləhət görülür. Bu qidalar donuz qripinə yoluxan şəxslərin vücudundakı soyuqdəymənin tez çıxmasına yardım edir və xəstəliyin sağalma müddətini tezləşdirir.

Donuz qripinə yoluxmamaq üçün nə etməli?

İnsanların çoxluq təşkil etdiyi yerlərdə çox qalmamaq;
insanlarla ünsiyyət zamanı cib dəsmallarından və ya başqa tibbi maskalardan istifadə etmək;
çirkli əllərlə ağız burun və gözə toxunmamaq;
əlləri tez-tez yumaq və ev işləri zamanı təmizləyici vasitələrdən daha çox istifadə etmək (spirt, odekolon və s.);
daha çox dincəlmək, təmiz havada gəzmək, düzgün qidalanmaq və yuxu rejiminə düzgün riayət etmək;

Məhbubə
Ölkə.az