Bir dilim qarpızın orqanizmə təsiri sizi təəccübləndirəcək

Yay aylarında havaların istiləşməsi ilə orqanizmin suya olan tələbatı da artır.

Ölkə.az xəbər verir ki, mütəxəssislər gün ərzində kifayət qədər su qəbul etməyin vacibliyini vurğulayır, su tərkibi yüksək olan meyvələrin isə bədənin maye balansını qorumağa kömək edə biləcəyini bildirirlər. Bu meyvələrin başında qarpız gəlir.

Tərkibinin 90 faizdən çoxu sudan ibarət olan qarpız yay aylarında həm sərinləşdirici təsiri, həm də zəngin vitamin və mineral tərkibi ilə diqqət çəkir. Xüsusilə isti havalarda yaranan maye itkisini qismən kompensasiya etməyə kömək edən qarpız aşağı kalorili olması ilə də üstünlük qazanır.

Susuzluğa qarşı təbii dəstək

Qarpız A və C vitaminləri, kalium və antioksidantlarla zəngindir. Mütəxəssislərin sözlərinə görə, qarpız suyun yerini tam əvəz etməsə də, gündəlik maye qəbuluna əlavə töhfə verə bilər. Tərkibindəki təbii şəkər sayəsində enerji verən bu meyvə yüksək su miqdarı ilə sərinlik hissi yaradır.

Su tərkibi yüksək olan digər meyvələr

Qarpızla yanaşı, yemiş, çiyələk, şaftalı və nektarin də yüksək su tərkibinə görə yay mövsümündə tez-tez seçilən meyvələr sırasındadır. Bu meyvələr balanslı şəkildə istehlak edildikdə həm maye ehtiyacının qarşılanmasına dəstək olur, həm də orqanizmi vitaminlərlə təmin edir.

Mütəxəssislərdən xəbərdarlıq

Mütəxəssislər xatırladırlar ki, su tərkibi yüksək olsa belə, meyvələr içməli suyun yerini tutmur. Buna görə də isti havalarda böyüklər gün ərzində kifayət qədər su içməyə davam etməlidirlər.

Həmidə İbrahimova