Bakı 2016-cı ildə turistlər üçün ən cəlbedici şəhərlərdən biri olacaq

Paris, Bakı və Rio-de-Janeyro 2016-cı ildə turistlər üçün ən populyar marşrutlar olacaq.

Travel.ru saytı Bakı, Paris və Rio-de-Janeyro şəhərlərini rusiyalı turistlərin səyahət etmək istədikləri şəhərlər siyahısında ilk üçlüyə daxil edib.

"Rusiyalı turistlər Futbol üzrə Avropa Çempionatı, Yay Olimpiya Oyunları və Formula-1 Avropa Qran-Pri yarışlarının keçiriləcəyi bu üç şəhərlərdə idman oyunlarını izləmək üçün artıq yerlər bron edirlər. Rusiyalı turistlər səyahət etdikləri şəhərlərdə ən az bir həftə qalmağa üstünlük verirlər.

İyunun 10-dan iyulun 10-na qədər Fransada Futbol üzrə Avropa Çempionatı keçiriləcək. Saytın məlumatına görə, iyun ayının ortalarında Parisdə 3 ulduzlu oteldə iki nəfər üçün sutkalıq orta qiymət 100 dollara bərabər olacaq.

İyunun 17-dən 19-na kimi Bakıda Formula-1 Avropa Qran-Pri yarışları keçiriləcək. Azərbaycan paytaxtı ilk dəfə bu yarışa ev sahibliyi edəcək. Təşkilatçıların məlumatına görə, xaricdən oyunları seyr etməyə gələn azarkeşlər arasında rusiyalı turistlər birinci yeri tutur.

Oktoqo.ru saytının məlumatına görə, Bakının mərkəzində bir gün qalmaq üçün turistlər sutkada 40 dollar ödəməli olacaqlar. Yarışlara 3 günlük biletlərin qiyməti isə 200 dollardan başlayır.

İlhamə
Ölkə.Az