Narsis kişilərdən uzaq durun

Hər kəs həyatında bir ağ atlı şahzadə gözləyir.

Təəssüf ki, nağıllar həmişə gerçəkliyi əks etdirmir. İdeal sevgili və ya ər axtarışına çıxanlar yəqin ki, həyatlarını tənha başa vurmalı olacaqlar. İdeal yoxdur. Bu öz yerində. Amma həyatınızı cəhənnəmə çevirəcək birisinin olmaması üçün qarşınızdakı insanın psixologiyasına yaxşı bələd olmalısınız.

Bu dəfə üzümüzü qızlara tuturuq. Sevgi münasibətləri üçün ən uyğunsuz variantlardan biri narsis sevgilidir. Narsis sözü əslində qədim yunan mifologiyasından götürülüb. Bir əfsanəyə görə özünü həddən artıq sevən gənc və yaraşıqlı oğlan bütün günü su kənarında öz əksinə baxaraq necə gözəl olması ilə öyünürmüş. Tanrıların qəzəbinə gələn gənc nərgiz çiçəyinə çevrilir və daima suya tərəf boylanır.

Narsist xarakter parlaq şəxsiyyətdir, xarizmatikdir, cəlbedicidir. Ona ilk baxışdan aşiq olmaq mümkündür. Lakin bu heç də yaxşı sonluqla nəticələnməyəcək. Onu necə tanımaq olar?

1. Narsizlər öz xarici görünüşlərinə və statuslarına aşiqdirlər.

Onları kiminsə mənəvi dərinliyi və gözəlliyi əsla maraqlandırmır. Narsistlər uğur, gözəllik, fiziki cazibə vurğunudurlar. Kosmetoloq və trenajior zallarında zaman keçirirlər. Cəmiyyət arasına hər çıxışlarının bir hadisə olmasını arzu edirlər. Narsislər əsasən metroseksualdırlar.

2. Risk və parlaq təəssürat görüntüsü yaratmağı sevirlər.

Onlar üçün gündəlik həyatda qaydalar yoxdur. Tez darıxırlar, işdə, sevgidə, cinsəl həyatda güclü emosiyalar axtarışındadırlar. Ekstremal idmana üstünlük verirlər. Gözəl əşyalara və geyimlərə sahib olmaq üçün ürəkləri gedir. Alkoqollu içkilərə meyillidirlər.

3. Onlar üçün ilk növbədə "mən" var.

Özlərindən başqa kimsəyə diqqət yetirmirlər. Donjuandırlar. Bir qadının diqqətini çəkmək üçün komplimentlər, hədiyyələr, daha nələr, nələrlə onu məst edə bilərlər. Lakin tezliklə marağı sönəcək və bu kəpənək başqa bir çiçək axtaracaq. Ciddi münasibətlərdən qaçırlar. Əgər narsizlə evlənmiş olsanız belə, bu o deməkdir ki, ömrü boyu onun nazını çəkəcək, xidmətində dayanacaqsız. Siz onun üçün həyat yoldaşı deyil, sadəcə qulluqçusunuz. Onu heç nə ilə razı salmaq mümkün deyil, siz həmişə nəyi isə düzgün etməyəcək bacarıqsız qadın olaraq qalacaqsınız. Nəticədə özünüzə inam itəcək, narsistin kölgəsi, köləsi olacaqsınız.

Bir daha düşünün. Bu sizə lazımdırmı?

İlhamə
Ölkə.Az