Bu gün Ümumdünya Fotoqrafiya Günüdür
Portret, bədii fotoqrafiya və son dövrün dəbi “selfie”...
Fotolar həyatımızın ayrılmaz hissəsinə çevrilib desəm, yanılmaram. Təbii ki, ilkin fotoqrafiya sənəti, tərzi ilə müasir fotolar arasında çox fərq var. Fərq yalnız texnologiya inkişafında deyil, eləcə də foto anlayışına yanaşmadadır. Fotolarda yalnız xüsusi günlərin və qeyri-adi hadisələrin əks etdirildiyi zamanlar çox geridə qalıb.
Sevinc, qürur və fəxr hiss etdiyimiz anların sənədli şəkildə saxlanılması, sanki zamanın bir anlıq dayandırılmasıdır bu fotolar.
Mobil telefonlara quraşdırılmış kameralar sayəsində bu proses saniyələr çəkir. Amma çoxlarınız yəqin bilmirsiz ki, ilk fotonu çəkmək üçün Jozef Nisefor Nyeps 8 saat zaman sərf edib. 12 iyul 1826-cı ildə çəkilən ilk ağ-qara foto “Pəncərədən mənzərə” adlanırdı. XIX əsrin ortalarında isə rəngli fotolar meydana gəldi. Onların çəkilməsi üçün isə üç fotokameradan istifadə edilirdi, bu fotokameralara rəng filtri (qırmızı, yaşıl və göy) quraşdırılırdı.
Fotoqrafiya gününün məhz 12 iyulda qeyd edilməsinin digər səbəbi isə, “Kodak” şirkətinin təsisçisi “fotoqrafiyanı hamı üçün əlçatan” edən Corc İstmanın doğum gününün məhz bu günə təsadüf etməsidir.
Müasir dünyanı fotoqrafiyasız təsəvvür etmək mümkün deyil. Axı fotolar yaddaş hücrələrimizin açarlarıdır. Həqiqətən də, əlimizə düşən köhnə şəkil qədər xatirələrimizi canlandıran, yaddaşımızı qıcıqlandıran başqa nə ola bilər? Bəlkə də o fotodan təsvir edilən məkana səfər, və ya rəsmdə yanımızda olan insanla yenidən görüşməmiz belə təsirləndirici olmur. Çünki məkan da, insan da dəyişir. Amma o fotonun əks etdirdiyi zamanda yaşadığımız hisslər dəyişmir.
Bu gün fotoaparat demək olar ki, hər kəs üçün əlçatandır, fotoqrafiya sənəti isə müxtəlif ali məktəblərdə tədris edilən peşəyə çevrilib. Jurnalistlərin hazırladığı fotoreportajlar, məşhurların fotosessiyaları xəbər dünyasının əsas atributlarındandır.
Fotoqraflar, yalnız həyatımızın xoş məqamlarını deyil, nə qədər arzuolunmaz olsa da müharibə və ölümü, zorakılıq və qəddarlığı, insan xislətinə xas olmayan dəhşətli hadisələri də çəkməyə məcburdurlar.
Bütün peşəkar fotoqrafları və fotoqrafiya həvəskarlarını bu münasibətlə təbrik edirik. Gözəl ideyalar, yaradıcılıq uğurları, uğurlu kadrlar arzu edirik!
