Mərkəzi Kəşfiyyat İdarəsi UFO-ların mövcudluğunu təsdiq etdi
Amerika kəşfiyyat orqanlarını yerdənkənar sivilizasiyanın mövcudluğunu gizlətdiyi üçün ittiham edirlər.
Amma bu yaxınlarda ABŞ-ın kəşfiyyat orqanı olan MKİ anomal hadisələrin fotosunu və bu barədə materialları mətbuata ötürüb. UFO-lara aid yüzlərlə foto və material gündəmə bomba kimi düşüb.
Kəşfiyyat orqanının rəsmi internet səhifəsində 1978-ci ilə aid fotolar yerləşdirilib. MKİ-nin bu addımı cəmiyyət tərəfindən şaşqınlıqla qarşılanıb. Amerika kəşfiyyat orqanı nəinki UFO-lar haqda sənədləri, eyni zamanda anomal hadisələrin təsnifatına aid geniş məlumatı da cəmiyyətə təqdim edib.
1947-ci ildən bu yana, MKİ dünyanın hər yerində uçan boşqablarla əlaqəli bütün hadisələri yaxından izləyib. Kəşfiyyat orqanının internet səhifəsinə yerləşdirilən fotoların əksəriyyəti ötən əsrin 40-50-ci illərində lentə alınıb. Fotoları quruma hadisələri yaxından izləyən agentlər təqdim edib.
Sayta yerləşdirilən sənədlərin böyük əksəriyyəti uçan boşqablar haqdadır. Soyuq müharibə illərində ABŞ və SSRİ bu uçan boşqablara görə bir-birini qarşılıqlı ittiham edirdi. Hər iki dövlət ərazisində peyda olan uçan obyektləri texnoloji silahlanma yarışının bir forması kimi qəbul edirdi.
Kəşfiyyat materiallarına əsasən, uçan disklərlə bağlı hadisələr əslində realdır və illuziya, təxəyyül məhsulu deyil. Müşahidə edilən obyektlərin əksəriyyəti disk formasında olub. UFO-larla bağlı müəyyən faktlar isə əslində təbiət hadisəsi olduğu üçün bu formada da qeydə alınıb.
Sənədlərə görə, UFO-lar həddən artıq manevr qabiliyyəti və çox yüksək sürəti ilə fərqlənir. Eyni zamanda bir neçə uçan obyektdən ibarət havada süzən qruplar da qeydə alınıb. Adətən uçan obyektlər tamamilə səssiz hərəkət edir.
1978-ci ilin sonunda dairə məhkəməsinin hökmünə əsasən, MKİ UFO-larla bağlı sənədlərin mövcudluğunu təsdiq etməli idi. Bu zaman 900 səhifəlik müxtəlif material iddiaçılara təqdim edildi.
Xüsusi xidmət orqanlarından əldə edilən sənədlərin analizi göstərdi ki, kəşfiyyat orqanları uzun müddətdir dünyanın hər yerindən UFO-lara aid material toplayır. 1975-ci ildə 8500 bu tip məlumat qeydə alınıb.
Ufoloqların bildirdiyinə görə, ötən əsrin ortalarında cəmiyyət UFO-larla bağlı məlumatlara o qədər də ciddi yanaşmırdı. 1952-ci ildə amerikalıların beynini məşğul edən yadplanetlilər barədə faktlar KİV tərəfindən başqa istiqamətə yönəldildi. KİV bu sifarişi ABŞ hökumətindən almışdı.
Gizli materiallar mətbuata ötürüldükdən sonra MKİ-nin mətbuat katibi bəyan edib ki, UFO-lar haqda sərbəst informasiya qanunundan sonra bu addımı atmaq qərarına gəliblər.
Hikmət
Ölkə.Az
