Rodeo yarışları haqda bilmədiklərimiz

Meksikalı və ABŞ-lı kovboylar arasında yaranmışdır. İlk vaxtlar rodeo təkcə vəhşi atları, öküzləri əhliləşdirmək üçün edilirdisə, daha sonrakı dövrdə əyləncəyə və idmana çevrildi.

Rodeo idmanının bir neçə növü var. "Vəhşi" öküzüçapma (Bullriding), yəhərli, ya da yəhərsiz at çapma (Saddle / Bareback Bronc Riding), lasso (kəmənd) ilə öküz tutmaq, öküzü yıxmaq və s. Ən tanınmışı və insanların böyük maraq göstərdiyi növü öküz və ya at çapmadır.

Kovboy 8 saniyə ərzində öküzün belində qalmalı, yalnız bir əli ilə öküzdən tutmalıdır. Digər əli isə nə öküzə, nə də özünə toxunmamalıdır. Yarışçı ayağı üzəngidən çıxar və cilovu əlindən buraxarsa və ya da atdan yıxılarsa uduzmuş sayılır. Atın ya da öküzün şaha qalxması üçün onlara ayrıca qayış taxırlar. Yarışçı öküzün belinə mindikdən və qapılar açıldıqdan sonra arxada duran adam həmin qayışı möhkəmcə sıxır və bununla heyvan güclü ağrılar keçirir. Ona görə də acıqlanan heyvan durmadan şaha qalxır, atılıb-düşür ki, belinəki yükdən qurtulsun.

İki hakim həm kovboya, həm də heyvana 1 - 25 arası xal verir. Yarışlara qabaqlar qadınlar da qatılırdı. Ancaq 1929-ci ildə Bonni Mak Kerrolun ölümü qadınların bu idmana olan istəyini azaltdı. İndi qadınlar rodeonun daha təhlükəsiz növlərinə qatılırlar.

Başlıca yarış hər il dekabr ayında Las Veqasda keçirilir. Ən tanınmış rodeo kovboylarının illik qazancı 100.000 dollara çatır. Castin Mak Brayd adlı dəliqanlı kovboy bütün karyerası boyunca 5 milyon dollar qazanıb.

Hikmət
Ölkə.Az