Bu ərzaqları soyuducuda saxlamaq olmaz

Müasir dünya mətbəxinin vazkeçilməz atributu soyuducudur. Adətən ərzaqları təravətli və uzun müddət saxlamaq üçün soyuducudan istifadə edilir. Çünki soyuducuda yaradılan şərait istənilən ərzağın və qidanın "ömrünü uzadır". Amma elə ərzaq və qidalar var ki, onları soyuducuda saxlamaq qətiyyən olmaz.

Ölkə.Az bu ərzaqların siyahısını təqdim edir:

1. 5 dərəcədən aşağı temperatur pomidor üçün zərərlidir. Amerikalı alim Cozef Merkol bildirir ki, soyuq pomidorun konsistensiyasını zəiflədir, xarici görünüşünə və dadına mənfi təsir göstərir. Kal pomidoru soyuducuda saxlamaq isə böyük səhvdir. Çünki soyuducuda kal pomidorun yetişmə prosesi dayanır.

2. Soyuducu eyni zamanda kartof üçün də məsləhət görülmür. Kartofu quru və sərin yerdə saxlamaq lazımdır. Adətən kartofu kağıza bükərək xüsusi kisələrdə saxlayırlar. Soyuducuda isə, aşağı temperatur kartofun tərkibindəki nişastanı şəkərə çevirir. Bu zaman tərəvəz rəngini dəyişir və kifayət qədər şirin olur.

3. Soyulmuş soğanı da quru və sərin yerdə saxlamaq lazımdır. Çünki bu tərəvəz daim hava sirkulyasiyasına ehtiyac duyur. Soyuducuda isə bu imkan yoxdur.

4. Sarımsaq da quru və qaranlıq yerdə saxlanmalıdır. Soyuducuda saxlanılan sarımsaq qısa müddətə kif atır.

5. Yetişmiş bananı soyuducuda bir neçə gün saxlamaq olar. Amma kal meyvə nəinki yetişmir, eyni zamanda çox qısa müddətə xarab olur. Bu meyvəni soyuducudan çıxaran kimi qabığı qaralır.

6. Alimlər çörəyi də soyuducuda saxlamağı məsləhət görmürlər. Hətta dondurulmuş çörək soyuducuda qalan çörəkdən daha yaxşı qalır. Çünki çox aşağı temperatur çörəyin boyatlaşması prosesini zəiflədir. Amma 4-6 dərəcə temperatur, yəni soyuducunun temperaturu boyatlaşma prosesini sürətləndirir.