Xeops ehramında gizli otaqlar tapılıb

Misir piramidalarının tədqiqatı ilə məşğul olan "ScanPyramids" beynəlxalq layihəsinin alimləri Xeops piramidasında anomaliya ilə rastlaşdıqlarını deyiblər.

Ölkə.Az xəbər verir ki, alimlər bildiriblər ki, ehramda gizli iki otaq tapılıb.

Layihə ötən il start götürüb. Alimlər qədim abidələrin sirrini açmaq üçün işə başlayıblar. Bir il ərzində beynəlxalq qrupun alimləri Xeops piramidasını, Xefren ehramını və Daxşurda yerləşən iki abidəni incələyiblər. Xüsusi qurğular vastəsilə baş tutan skanlama əməliyyatında infraqırmızı termoqrafiya, radioqrafiya və 3D texnologiyasından istifadə edilib.

Mehdi Tayyubinin sözlərinə görə, incələmə işlərindən sonra Xeops piramidasında iki anomaliya üzə çıxıb. Söhbət əvvəllər məlum olmayan iki boşluqdan gedir. Ola bilsin ki, bu boşluqlar ya otaq ya da keçiddir. Onlardan biri piramidanın şimal hissəsində giriş qapılarının altında, digəri isə ehramın şimal-şərqində yerləşir.

Nəticələr laboratoriyaya göndərilib. Alimlər komputer modelləşdirməsinin hesabına anomaliyanın təbiətini, ölçüsü və təyinatını öyrənməyə ümid edirlər. Artıq müəyyən edilib ki, boşluqlar bir-biri ilə birləşdirilməyib.

Xeops ehramında ilk anomaliya 2015-ci ilin payız aylarında aşkar edilmişdi. Müəyyən edilmişdi ki, piramidanın bəzi daş blokları digərlərinə nisbətən daha yüksək temperatura malikdir. Tədqiqatlar isə yüksək tempraturun ehramda gizli otaqlar olduğu səbəbindən yarandığını dəqiqləşdirmişdilər.

Hikmət
Ölkə.Az