Arxeoloqlar Fironun qayığını tapdılar

Misirdə aparılan arxeoloji qazıntılar zamanı Fironun qayığının qalıqları tapılıb.

Ölkə.Az xəbər verir ki, Firon 3-cü Senusert bu qayıqla son səfərə yollanmalı idi.

Tapılan rəsmlər qədim misirlilərin hansı qayıqlardan istifadə etdikləri barədə təsəvvür formalaşdırmağa imkan yaradır.

Tapıntı Nilin qərbində yerləşən sərdabənin yaxınlığında aşkar edilib.

Divarlara 120 qayıqdan ibarət donanma rəsmləri həkk edilib. Rəsmlərdən başqa arxeoloji qazıntılar zamanı taxta qırıntıları da tapılıb. Bu qırıntılar Senusertin qayığının qalıqlarıdır. Firon o biri dünyada bu qayıqla səyahətə çıxmalı idi.

21 metr uzunluğu, 4 metr eni olan yeraltı salon qədim Abidos şəhərində ilk dəfə 1901-ci ildə tapılıb. Arxeoloqlar qumdan çıxan dam örtüyünü görmüşdülər. Qazıntı zamanı dam uçduğu üçün layihə dayandırılmışdı.
Veqner və komandası son iki il ərzində qazıntı aparıblar. Qazıntılar zamanı gizli otaq tapılıb. Otaqda gildən hazırlanmış yüzlərlə qab-qacaq olub.

Divara cızılmış qayıq rəsimləri arasında iribuynuzlu inək, ceyran və çiçək rəsimləri də var. Bu rəsmlərdə Fironun şəxsi donanması və ya Misir gəmiləri təsvir olunduğu barədə tarixçilər bir fikrə gələ bilmirlər.

Yüksəkçinli şəxslərin sərdabələri yaxınlığında qayıq basdırmaq ənənəsi qədimdən var. Məsələn, 1954-cü ildə arxeoloqlar Xeops piramidasının yaxınlığında bir gəmi tapmışdılar. 30 il sonra o ərazidə başqa gəmi tapılmışdı.