Dünyanın ən məşhur qadın siyasətçiləri

Siyasət tarix boyu həmişə kişi peşəsi sayılıb.

Günümüzdə bu fakt reallığını qoruyub saxlasa da, hər il zərif cinsin nümayəndələri də siyasətə atılır. Onlar arasında dünya üzrə nüfuz qazananlar da az olmayıb. 20-ci əsrin tarixində Marqaret Tetçer, İndira Qandi, Benazir Bhutto kimi dünya şöhrətli siyasətçilərin adını sadalamaq olar. Bəs görəsən, son 15-20 il ərzində hansı qadınlar dünya siyasətində iz buraxıb?

Ölkə.Az dünyanın ən nüfuzlu siyasətçi qadınlarının siyahısını təqdim edir.

Angela Merkel-Almaniya Kansleri

Angela Merkel 10 ildən çoxdur ki, Avropa iqtisadiyyatının lokomotivi sayılan Almaniyanı idarə edir. Alman kansleri sakit təbiətlidir və illərlə eyni pencəkdən istifadə edə bilər. Dünya ictimaiyyəti Merkelin qaşlarını çatmasından və baxışlarından hərəkətlərini bilməyə çalışır.

Hillari Klinton-keçmiş dövlət katibi, prezidentliyə namizəd

Hillari Klinton ABŞ dövlət katibi postunu tutub və Demokratların prezidentliyə namizədi olub. O, ABŞ-ın eks prezidenti Bill Klintonun həyat yoldaşıdır. Uzun illər siyasi arenada fəaliyyət göstərir. Nyu-York ştatının senatoru olub. Bu il keçirilən seçkilərdə Donald Trampa uduzdu.

Dilma Rusef-Braziliyanın keçmiş prezidenti

Dilmanın atası Bolqariyalı emiqrantdır. O, kommunist düşüncələrinə görə Braziliyaya köçmək məcburiyyətində qalıb. Dilma 1964-cü ildə Braziliyada baş tutan hərbi çevrilişdən sonra radikal sosialistlərə qoşulub. Fəaliyyətinə görə həbsxanada yatıb, işgəncələrə məruz qalıb. İki illik həbsdən sonra universitetə daxil olur və müxalifətə qoşulur. Bir müddət sonra energetika naziri, prezident adminstrasiyasının rəhbəri postlarını tutur. Nəhayət, prezident də seçilir.

Mişel Obama- ABŞ-ın birinci xanımı

Əri Barak Obamanın zəif reytinqi olsa da, Mişel mövqeyini qoruyub-saxlayır. Mişel ən çox geyim tərzinə görə tənqid edilir. Prinston və Harvard hüquq məktəbinin məzunu xanım Obama eyni zamanda ərinə nüfuz etdiyinə görə də tənqid edilir. Onu Nensi Reyqan və Eleonora Ruzveltlə müqayisə edirlər.
Mişel bir çox tədbir və aksiyaların təşkilatçısı kimi tanınır. Bir çoxlarının fikrinə görə, prezidentliyə namizəd olsa, şansı çoxdur.

II Yelizaveta-Böyük Britaniya kraliçası

Kraliça ölkə idarəçiliyində rəsmi olaraq iştirak etməsə də, onun təsiri və nüfuzu bu günə qədər də hiss edilir. Kraliça 1976-cı ildə elektron məktub göndərərək bu sahədə ilk dövlət başçısı olub. Paraşütlə atılır, ürəyi istəyən geyimdə avtomobil idarə edir. Bununla belə müdrik və təcrübəli kraliça imicini qoruyub saxlayır. Ölkənin baş naziri və bir çox siyasətçisi onunla məsləhətləşir.

Pak Kın Xe-Cənubi Koreyanın prezidenti

Onun atası general Pak Çjon Xi hakimiyyətə hərbi çevrilişlə gəlib. General qəddar idarəçiliyi və vətəndaş azadlığına təzyiq etməyi ilə yadda qalıb. Onun qızı isə humanistliyi və nüvə silahından imtina etməyi ilə şöhrətlənib. 45 yaşında siyasətə atılan Pak Kın qısa müddətə cəmiyyətin etibarını qazanaraq ölkənin ilk prezidenti seçilib.

Elen Conson-Serlif-Liberiya prezidenti

Liberiyanın 78 yaşlı prezidenti Elen Conson əvvəl iqtisadçı olsa da, sonradan nüfuzlu siyasətçiyə çevrilib. Əvvəllər hərbi münaqişələrdən və daxili çəkişmələrdən əziyyət çəkən Liberiyada artıq sülh hökm sürür. Elen dünyanın ilk qaradərili qadın prezidentidir. O, eyni zamanda Afrikanın ilk qadın prezidentidir. 2011-ci ildə qadın haqlarını qoruduğu üçün Nobel mükafatına layiq görülüb. Karyerasına maliyyə nazirinin köməkçisi kimi başlasa da, sonradan maliyyə naziri təyin edilir. Hərbi rejimi tənqid etdiyi üçün ölkədən qovulur. 12 il sonra Dünya Bankının əməkdaşı kimi ölkəyə qayıdır və siyasətə atılır.

Kristina Fernandes de Kirşner-Argentinanın eks-prezidenti

Onun əri Nestor Kirşner də Argentina prezidenti olub. Prezidentlik müddəti başa çatan Nestor bəyan edib ki, əgər həyat yoldaşı prezident seçilsə, ölkənin tarixini dəyişə bilər.
Kristina siyasətə sevgisi və ehtirası ilə hər zaman seçilib. 2007-ci ildə keçirilən prezident seçkilərində qələbə qazanıb. Ölkəni böhrandan xilas etmək üçün yeni prezident Argentinaya investisiya cəlb etmək üçün fəaliyyətə başlayır. 2015-ci ilə qədər bu postu tutub.

Mişel Baçelet-Çili prezidenti

İxtisasca cərrah olan Mişel 2014-cü ildə prezident seçilib. Bu müddətə qədər o, müdafiə naziri və səhiyyə naziri vəzifələrini icra edib. Çili tarixində ilk qadın prezidentdir. Çilinin varlı və kasıb təbəqəsi arasındakı fərqi azaldacağına söz verib. Bu səbəbdən ölkə iqtisadiyyatı möhkəmlənir, infilyasiya azaldılır, işsizliklə mübarizə aparılır.

Baçelet vaxtilə diktator Pinoçetin əmri ilə həbsxanada da yatıb. İşgəncələrə məruz qalan Baçelet ölkədən sürgün edilir. Amma Mişel geri qayıdır və siyasi karyerasını qurur. Çili xalqı onu sevsə də, məktəblilər prezidenti xoşlamır. Çünki Baçelet 9 saatlıq tədris qanununu imzalayıb.

Hikmət
Ölkə.Az