Bütün dinlərin məbədi burada yerləşir

Buranı dinlərin qovuşduğu yer adlandırırlar.

Ölkə.Az xəbər verir ki, Rusiyanın Kazan şəhərinin yaxınlığında yerləşən Staroye Arakçino kəndində maraqlı məbəd vardır. Belə ki, bu məkanda pravoslav kilsəsi,
məscid, sinaqoq və paqoda qonşuluqda yerləşirlər. Ümumillikdə isə, bu layihədə dünya üzrə 16 dinin işarə və elementlərinin yer alması nəzərdə tutulub.

Bu qeyri-adi tikilini memar İldar Xanov Ümumkainat məbədi adlandırıb. 1994-cü ildən başlayaraq öz kənd evinin həyətində unikal məbədin tikilməsinə başlayan İldar Xanovun əsas arzusu bütün dinləri bir yerdə birləşdirmək olub. İldar Xanov Kazanda çox tanınmış rəssam və memardır. O müsəlman olsa da, bütün dünya dinləri ilə maraqlanır və onlardan hər birinin müqəddəs məkanlarını ziyarət edib. Onun sözlərinə görə, yuxuda İsa peyğəmbər ona bu addımı atmağa çağırıb. Bundan sonra İldar dinlərin məbədini tikməyə başlayıb.

Onu da qeyd edək ki, İldar Xanov öz arzusunun tam reallaşmasını görə bilməyib. 2013-cü ilin 9 fevral tarixində o uzun sürən xəstəlikdən sonra Moskvada dünyasını dəyişib. Təəssüf ki, məbədin tikintisi də yarımçıq qalıb.