SSRİ-də “super əsgər” layihəsi

Almanlar insanlar üzərində insanlığa yaraşmayan təcrübələr aparıblar. Şübhəsiz ki, nasist Almaniyası dustaqlar üzərində bir çox eksperimentlər aparıblar. Amma çox az adam bilir ki, sovet alimləri bu tip təcrübələrə alman həmkarlarından da əvvəl başlayıblar.

Ölkə.Az bu gün SSRİ dövründə aparılan “super əsgər” layihəsini oxucularına təqdim edir.

Bu gün sovet alimləri tərəfindən mükəmməl silah yaratmaq üzrə işlənən minimum üç proqramın adı məlumdur. Görəsən silahlı qüvvələrin arxivlərində nə qədər məxfi material var? Çox güman ki, üzərində məxfi qrifi olan sənədlər və məlumatlar heç vaxt cəmiyyətə açıqlanmayacaq.

Sümük əvəzinə titan

1945-ci ildə amerikalı hərbçilər nasist alimlərinin gizli tədqiqat mərkəzlərindən birini ələ keçirdilər. Otaqlardan birində sovet əsgərlərinin meyitləri var idi. Onların bədəninə sümük və oynaqları əvəz edən titan hissələri yerləşdirilmişdi. O vaxt heç kəs bunun alman həkimlərin təcrübəsi olmadığını düşünə bilməzdi. Mərkəzin həkimləri dindirildikdən sonra məlum oldu ki, almanlar belə bir tibbi əməliyyat və eksperiment keçirməyiblər. Sadəcə hazır nümunələri tədqiq edirmişlər. ABŞ-da dərhal xüsusi bölmə yaradıldı və professor Strasberq rəhbər təyin edildi. Bu bölmə SSRİ-də bu tip təcrübələr barədə məlumatların toplanması və analizi ilə məşğul olmağa başladı.

Strasberqin rəhbərlik etdiyi qrup müəyyən məlumatlar əldə edə bildi. Bu məlumatlara əsasən, 1930-cu illərdə partiyanın əmri ilə Sovet İttifaqında mükəmməl əsgər yaratmaq üçün proqram həyata keçirilməyə başlayır. Bu təcrübələrin nəticələrini amerikalı hərbçilər nasistlərin laboratoriyalarında tapmışdılar.

Qrupun əməkdaşları müəyyən etdilər ki, bu proqramda 300-dən çox əsgər iştirak edib. Amma nəticələr elə də uğurlu alınmamışdı.

Əsgərlərin sümük və oynaqlarını titan protezlə dəyişdirsələr də, materialın uyğunlaşması çox zəif idi. Bundan başqa, təcrübə iştirakçılarının bir çoxu əməliyyatdan sonra ağrıya dözə bilməyiblər. Eksperimentdə iştirak edənlərin böyük əksəriyyəti ölüb.

Bununla belə, neqativ nəticələr tədqiqatçıları işdən soyutmadı. Alimlər ağrıya cavab verən beyin hissəsini “söndürmək”lə beyini idarə etmək barədə qərar qəbul etdilər. Könüllülərin beyninə qızıldan hazırlanmış xüsusi iynə yerləşdirdilər. Bu əməliyyatdan sonra əsgərlər ağrı hiss etmirdilər və bu da insan orqanizminə titan sümük və oynaqların yerləşdirilmə əməliyyatının uğur faizini artırdı. Beyni idarə etməyin əks təsiri isə müxtəlif psixi pozğunluqla müşahidə edildi.

Professor Strasberqin məlumatlarına inanmaq çətindir. Amma 1994-cü ildə Vitebsk şəhərinin həkimi Konovalenko Sergey hərbi qəbiristanlığın ətrafında gəzinti zamanı qəribə skeletlə rastlaşır. Çayda suyun səviyyəsi qalxmışdı və köhnə qəbirləri yuyan sel suları sümükləri üzə çıxarmışdı. Konovalenko metal protezlə bir-birinə birləşdirilmiş skelet qalıqları tapır. İlk baxışdan həkim anlayır ki, bu protez amputasiya edilmiş ətrafları yox, məhz insan sümüklərini əvəz edir. Protezlərdən birinin üstündə belə bir yazı var idi: “Xarkov, 1934. ASÇ 760978-Ç”.

Sergey xəstəxanaya yollanaraq lazımi avadanlıqları gətirmək, qalıqlar üzərində eksqumasiya keçirmək qərarına gəlir. Amma yağış başlayır və skelet qalıqlarını su yuyaraq çaya tökür.

Yarı insan, yarı meymun

Super əsgər yaratmaq layihəsinin növbəti eksperimenti akademik İvanovun adı ilə bağlıdır. Alim kiborq prototipi yaratmaq barədə tapşırıq alır. Siyasi büro yeni super əsgər yaratmaq ideyasında maraqlı idi. Layihəyə əsasən, yaradılan yeni əsgər adi insandan qat-qat güclü, asan idarə edilən və ağrıya dözümlü olmalı idi. Elmi laboratoriya Yalta altındakı qoruqda və Fransa Qvineyasında yerləşirdi. Akademik tədqiqatlarında yeni məxluq yaratmaq fikrinə düşür. O, insanı və meymunu cütləşdirmək istəyir. Əvvəlcə eksperimentə əsasən dişi meymuna müxtəlif preparatlar vasitəsilə insan sperması yerləşdirmək istəyirdi. Amma eksperiment alınmadı.

Eksperimentin birinci mərhələsində yaşanılan uğursuzluqdan sonra akademik İvanov gedişatı dəyişmək qərarına gəlir. O, meymun sperması ilə qadını mayalandırmaq istəyir. Amma yenə də nəticə istənilən uğuru gətirmədi. Sonuncu cəhddən sonra akademik insan və meymunu təbii yolla cütləşdirmək qərarına gəlir. Maraqlıdır ki, kifayət qədər adam könüllü olmaq üçün müraciət edir. Həm kişiylə dişi meymunu, həm də qadınla erkək meymunu cütləşdirdilər.

Təcrübənin nəticələri şübhəli idi. Akademik İvanov həbs edildi və güllələndi. Tədqiqat institutu ləğv edildi.

Bu gün eksperimentin başa çatdırılması barədə iki versiya səsləndirilir. Birinci versiyaya əsasən, akademik İvanov tədqiqatlar və eksperimentlər nəticəsində heç nə əldə edə bilməyib. Bu həqiqətə daha çox uyğundur. İkinci versiyaya görə, akademikin əldə etdiyi nəticə hakimiyyəti qane etməmişdi. Bütün materiallar məxfiləşdirildi və eksperiment qapadıldı. Alimin yeni məxluq əldə edib-edə bilmədiyi sualına hələ də cavab yoxdur.

Əfqan təcrübəsi

Bu təcrübənin yenidən təkrar edilib-edilməməsi barədə heç bir məlumat yoxdur. Amma super əsgər yaratmaq konsepsiyası olduğu kimi qalmışdı. Yeni təcrübələr Əfqanıstan müharibəsində start götürdü. Bu dəfə psixotrop maddələrdən istifadə edildi. Bu maddələr əsgərlərin dözümlülüyünü artırmalı, onları daha aqressiv etməli idi. Əsgərlər eyni zamanda yuxu və qidadan imtina etməli idilər. Eksperiment zamanı mənfi təsirlər və effekt müşahidə edildi. Əsgər ekstremal şəraitdə bir həftə yuxusuz və qidasız hərəkət edə bilirdi. Amma sonradan komaya düşürdü və ölürdü.

Bəzi hərbçilərin danışdığına görə, çeçen müharibəsində xüsusi qruplar bu tip preparatlar qəbul edirdilər və döyüşçülərin arxasına keçərək böyük bir aulu məhv edirdilər. Amma bunu təsdiq edən heç bir fakt yoxdur.

Sovet biorobotları

SSRİ-də super əsgər yaratmaq üçün hazırlanan və həyata keçirilən sonuncu eksperiment biorobot yaratmaq layihəsi idi. Transplantologiya sahəsində əldə edilən uğurlar alimləri yeni elmi hərbi sahəyə tətbiq etməyə məcbur etdi. Vladimir Demixinin eksperimentləri hamıya məlumdur. Məhz bu eksperimentlərdə əldə edilən uğurlar biorobot yaratmaq ideyasına təkan verdi.

“АСЖЛ» adlandırılan xüsusi aparat quraşdırıldı (abveriaturanın mənası Lebedevin həyatını qoruyan apparat deməkdir). Apparatın sayəsində insan başı bədənsiz fəaliyyət göstərə bilərdi. Apparat xarici görünüşünə görə xüsusi skafandra oxşayırdı. Bu skafandra canlı məxluqun kəsilmiş başını yerləşdirmək mümkün idi. Eksperimentin necə inkişaf etdiyi, hansı nəticələr əldə edildiyi barədə məlumat yoxdur. Amma bir neçə il sonra layihə bağlandı. Əks halda Sovet İttifaqının ordusu belə “maraqlı silah”larla təchiz edilərdi.

Yuxarıda yazılanlardan belə qənaətə gəlmək olar ki, super əsgər yaratmaq ideyası Sovet İttifaqı dağılana qədər qüvvədə və gündəmdə olub. Cəmiyyətə sadəcə bir neçə eksperiment barədə məlumat verilib. Nə qədər layihə məxfi qrift altında saxlanılır, naməlum olaraq qalır...