Sonuncu Amerika müharibəsinin kabusları
İnsanlar arasında mövcud bir fikrə görə, döyüş zamanı həlak olan və şərəflə dəfn edilməyən əsgərlər faciəvi surətdə öldükləri yerə bağlı qalırlar.
"Ölkə.Az" bu gün böyük savaşların getdiyi ərazidə müxtəlif şahidlərin kabus gördüklərinə aid iddialarını işıqlandıracaq.
ABŞ-da 18-ci əsrin ortalarında baş verən vətəndaş müharibəsi bu ölkənin tarixində ən qanlı və faciəvi savaş sayılır. Savaş çox insanın ölümünə səbəb oldu. Şahid ifadələrinə əsasən, bəzi böyük kənd və qəsəbələrin bütün kişiləri müharibədə qırılıb.
Şaylo ətrafında döyüş
Şaylo şəhəri yaxınlığında döyüş vətəndaş müharibəsinin ən qanlı savaşlarından biri sayılır. Bəzən çox qaranlıq gecələrdə, Ayın görünmədiyi vaxtda bu ərazidə yarımşəffaf əsgər fiqurlarının hücuma can atdığını, güllələrin uçuşduğunu, bombaların partladığını görmək olar.
Reportyorlar və jurnalistlər uzun müddət bu ruhları lentə almağa çalışdılar. 1959-cu ildə jurnalist Maykl Koll şəffaf kişi siluetini lentə ala bildi. Kabus tüfəngə oxşayan əşyaya söykənərək addımlayırdı.
1963-cü ildə yerli fermerlər “gecə qonaqları”nın bir neçə fotosunu lentə ala bildilər və əsl savaşın şahidi oldular. Şahidlərindən biri hadisəni belə xatırlayır: “Hər şey qəflətən baş verdi. Stivlə birlikdə sahədə gəzişirdik. Qəflətən addım səsi və güllə atışına bənzəyən səs eşitdik. Sonra qarşımızda işıqlı yarımşəffaf fiqurlar peyda oldu və onlar hücuma hazırlaşırdılar. Biz yerimizdə donub qalmışdıq. Bu fiqurlar bizim yanımızdan ötərək qaranlıqda yoxa çıxdılar....”
“Qəbiristanlıq təpəsində müharibə”
Kabus-əsgərlərin tez-tez göründüyü növbəti məkan Cənub və Şimal arasında savaşın getdiyi ərazidir. Sonradan bu müharibə qəbiristanlıq təpəsində savaş adlandırılıb.
Gettisberq ətrafındakı savaş hər iki tərəf üçün həlledici idi. Uzun müddət bu ərazidə paranormal hadisələrin qeydə alındığı barədə heç bir qeyd yoxdur.
Amma 1993-cü ildə bu yerdən atəş səsini, partlayışı, qışqırığı, hücum edən və müdafiə olunanların danışıqlarını andıran müxtəlif səslərin eşidildiyi barədə bir çox yerli sakinin ifadələri ortaya çıxdı.
Bu hadisələrə aid filmin çəkilişləri vaxtı jurnalistlərdən ibarət qrup qəbiristanlıq təpəsinə dırmaşmalı idi. Bu təpə meydanda ucalmışdı. Jurnalistlərdən ibarət qrup bu yerə, yəni xüsusilə amansız savaşların getdiyi əraziyə yaxınlaşanda yanki formasında qoca peyda oldu. O, tüfənginə söykənərək ağır-ağır addımlayırdı. Onun forması köhnə idi və üzərinə barıtdan əlavə toz da hopmuşdu. Havadan kükürd qoxusu gəlirdi. Bu qoxu vətəndaş müharibəsi üçün xarakterik qoxu idi. Çünki o dövrdə barıtı əsasən kükürddən hazırlayırdılar. Qoca yaxınlaşan jurnalistləri görəndə dayandı. Şahidlərin bildirdiyinə görə, onlar qoca kişini görəndə qəflətən yerin altından qatı duman qalxdı. Jurnalist qrupu bu döyüşçüyə yaxınlaşanda o, əlini çantasına salaraq oradan köhnə güllələr çıxardı. Qoca güllələri jurnalistlərə uzadaraq deyib ki, çətin gün idi, uşaqlar! Sonra döyüşçü üzünü çevirib təpəyə doğru addımlamağa başlayıb.
Baş verənlərə jurnalistlər dərhal reaksiya verə bilməyiblər. Amma bir neçə dəqiqədən sonra özlərini toplayıb qocaya çatmaq və belə bir zarafatın yersiz olduğunu demək istədilər. Amma onların cəhdi uğursuz oldu. Qəflətən yaranan duman 10 dəqiqə sonra çəkildi və naməlum qoca yoxa çıxdı. Bundan başqa, ekspertlər müəyyən etdilər ki, jurnalistlərə verilən güllələr əsl güllələrdir. Vətəndaş müharibəsi dövründə hərbçilər və əsgərlər məhz bu güllələrdən istifadə ediblər.
“Şeytan yeri”
Bu yer vətəndaş müharibəsi başa çatdıqdan sonra belə adlandırılıb. O, daş və qaya parçalarının topası kimi görünür. Müharibə dövründə bu ərazidə konfederatlar ordusunun snayperləri atəş nöqtələrini müəyyənləşdirmişdilər. Bu yüksəklik hər iki tərəf üçün strateji ərazi sayılırdı. Tarixi mənbələrə əsasən, həmin savaş günü 50 mindən çox insan həlak olub. Bu savaşın sağ qalan şahidləri bildirirlər ki, o qədər meyit olub ki, hətta onları yarıb keçmək də mümkün olmayıb. Hərbi əməliyyatlar zamanı keç kəs yaralıları savaş meydanından çıxarmayıb, həlak olanları heç kəs basdırmayıb və nəticədə çürüyən meyitlər üfunət iyi verməyə başlayıb.
Bu gün isə əldə olan şahid ifadələrinə görə, vətəndaş müharibəsi başa çatdıqdan 1 il sonra yerli sakinlər kifayət qədər tez-tez ərazidən qəribə səslər eşitməyə başlayıblar. Ərazidən keçən səyyah pis üfunət iyindən normal nəfəs ala bilməyib. Yerli sakinlər bildirirlər ki, hələ də bu yerin yaxınlığından gecə saatlarında güllə və partlayış səsləri gəlir.
Paranormal hadisələrin tədqiqi ilə məşğul olan mütəxəssislərin fikrinə görə, bu ərazi müxtəlif kabusların “mənzilidir”. Bu savaşda iştirak edən əsgərlərin böyük əksəriyyəti nə olduğunu dərk etmədən döyüş meydanında həlak olublar. Kabusların hələ də ərazidə avaralanmaları faktı bununla izah edilir. Bəzən çöldə gəzən yarımşəffaf bir əsgər fiquru yox, böyük bir taboru görmək mümkün olur. Bu qrupun əsgərlərinin kabusu yenə də təkrarən o günləri yaşayırlar.
Hadisədən illər sonra savaş meydanının yaxınlığında bu dəhşətli hadisələrə aid muzey açıldı. Hər il minlərlə turist muzeyi ziyarət edir. 1988-ci ildə Keyl cütlüyü bu əraziyə səfər edir. Səfər vaxtı cütlük qeyri-adi heç nə ilə rastlaşmır. Amma evə qayıtdıqdan sonra çəkilən fotoları incələyəndə qeyri-adi mənzərə görürlər. Müxtəlif heykəllərin yanında çəkilən fotolarda naməlum yarımşəffaf fiqur və siluetlər gözə çarpıb. Terezanın köhnə topun yanında çəkdirdiyi fotoda kabus daha dəqiq görünür. Fotoda Tereza kimi topa dirsəklənib kameraya poza verən insan silueti görünür.
Frederiksberq-kabus şəhər
Frederiksberq şəhəri qarşıdurma tərəfləri üçün çox böyük strateji əhəmiyyətə malik idi. Vətəndaş müharibəsi dövründə şəhər bir neçə dəfə əldən-ələ keçdi. Təkcə 1862-ci ilin dekabr ayında bu ərazidə 20 mindən çox adam həlak oldu. Tədqiqatçıların əldə etdikləri sənədlərə əsasən, vətəndaş müharibəsi dövründə şəhər ərazisində 100 mindən çox insan ölüb. Bu səbəbdən demək olar ki, şəhərin hər küçəsi və evində kabus var. Kabuslar daha çox şəhər ratuşasında peyda olur. Bu bina 1810-cu ildə inşa edilib. Şahidlər tez-tez nəinki əsgər, hətta heyvan kabusu da görürlər.
Belə ki, 1989-cu ildə şəhər sakini xanım Meri Uotson binanın yan-yörəsində yarımşəffaf insan fiqurlarının gəzişdiyini görüb. Onlardan başqa, Meri bir neçə at fiquru da görüb. Elə təəssürat yaranırdı ki, bu adamlar şəhərə indi gəliblər və heyvanların qoşqusunu çıxarıb istirahət etməyə hazırlaşırlar. Şəhər arxivindəki informasiyaya əsasən, 1862-ci ilin dekabr ayında şəhərə konfederatların zabit qrupu təşrif buyurub. Bütün zabitlər yatdıqları yerdə qəddarcasına qətlə yetiriliblər. Onların atları saxlanılan axur isə yandırılıb...
Kabusların mövcudluğuna dair dünyada faktlar çoxdur. Rəsmi elm isə, onların mövcudluğunu birmənalı olaraq qəbul etmir və rədd edir. Amma onları gördüyünü iddia edən minlərlə, onminlərlə şahid ifadələri və faktlar mövcuddur. Bəs bu nədir? Xəyal? Təsəvvür? Alt şüur? Nədir? Hələ ki, elm bu suala cavab tapa bilmir.
Hikmət
Ölkə.Az
