Həftənin icmalı
10.11.2014
Rusiya 7 milyard dollar itirdi
Bu ilin yanvar-sentyabr aylarında Rusiyanın neft ixracatı dəyər həcmində ötənilki dövrlə müqayisədə 5,2 faiz azalıb.
Rusiyanın bu dövrdəki neft ixracatı 121,369 milyard dollar təşkil edib. Fiziki həcmdə isə RF-nin neft ixracatında eniş 5,1 faiz olub, 175,43 milyon tondan 166,299 milyon tona düşüb.
Əsas neft ixracatı uzaq xaricin payına (114,507 milyon dollar) düşüb, lakin bu rəqəm də keçənilki dövrlə müqayisədə 4,2 faiz az olub. Rusiyanın MDB ölkələrinə neft ixracatı isə 1,84 faiz azalma ilə 6,862 milyard dollar təşkil edib
Mustafa Kamal Atatürkün ölümündən 76 il keçdi
Bu gün Türkiyənin ilk prezidenti olan Mustafa Kamal Atatürkün ölümündən 76 il ötür.
Ölümündən bu qədər illər ötməsinə baxmayaraq Atatürk ideyası hələ də yaşamaqda davam edir. Təsadüfi deyil ki, bu gün Türkiyənin ayaqda qalması birbaşa Atatürk ideologiyası ilə əlaqəlidir.
Mustafa Kamal Atatürk: 1881-ci ildə Osmanlı İmperiyasına məxsus Saloniki şəhərində dünyaya gəlib. 1896-1899-cu illərdə müasir Makedoniya ərazisində yerləşən Manastır Hərbi məktəbini bitirərək İstanbul Hərb Məktəbinə qəbul olub. 1902-ci ildə leytenant rütbəsi ilə məzun olub və Hərbi Akademiyada təhsilinə davam edib. 1905-ci il yanvar ayının 11-də kapitan rütbəsi ilə Akademiyanın məzun olub. 1905-1907-ci illər arasında Dəməşqdə 5-ci Orduda xidmət etmiş, 1907-ci ildə adyutant rütbəsinə yüksəlmişdir. Daha sonra Manastıra 3-cü Orduya təyin olunur. 1909-cu il aprel ayının 19-da İstanbula daxil olan Hərəkat Ordusunda qərargah rəisi olaraq xidmət etmişdir. 1910-cu ildə Fransaya göndərilmiş, Pikardi manevrlərində iştirak etmişdir. 1911-ci ildə İstanbulda Baş Qərargah Mərkəzində xidmətə başlamışdır.
10 noyabr 1938-ci il saat 09:05-də tutulduğu sirroz xəstəliyindən İstanbulda Dolmabaxça sarayında vəfat etmişdir. Cənazəsi 21 noyabr 1938-ci ildə müvəqqəti olaraq Ankara Etnoqrafiya Muzeyində dəfn edilmiş, mavzoleyi tikildikdən sonra isə 10 noyabr 1953-cü ildə oraya köçürülmüşdür.
Qeyd edək ki, vəfat etdiyi gün ilə əlaqədar bu gün bütün Türkiyə ərazisində saat 09:05-də görkəmli şəxsiyyət bir dəqiqəlik sükut ilə anılıb.
PKK liderlərindən biri öldürüldü
PKK terror təşkilatının liderlərindən biri Kobanidə öldürülüb.
Belə bir iddia ilə İŞİD terror qruplaşmasına yaxın media orqanları çıxış edib.
Xəbərdə deyilir ki, Kobanidə İŞİD ilə kürd yaraqlıları arasında davam edən döyüşlərdə PKK-nı idarə edən 3 şəxsdən biri olan Bahoz Erdal öldürülüb. İddiaya görə, Bahoz Erdal öldürülən zamann onun sifəti tanınmaz hala düşüb.
Bahoz Erdalın Şimali İraqdan kürd yaraqlılara mənəvi dəstək və İŞİD-ə qarşı müqaviməti təşkil etmək üçün Kobaniyə gəldiyi bildirilir. O, şəhərin "Azadi" (Azadlıq) meydanında olarkən İŞİD birdən hücum edib. Hücumda Bahoz Erdalı mühafizəçiləri və kürd yaraqlıları qoruya bilməyib.
Xəbərdə iddia edilir ki, Kandildən Bahoz Erdalın öldürülməsinin gizli saxlanılması əmr edilib.
Qeyd edək ki, Bahoz Erdal adıyla bilinən bu şəxsin əsl adı Fehman Hüseyndir. Terrorçu lider 1969-cü ildə Suriyada anadan olub. Gənclik illərində Dəməşqdə tibb təhsili alıb. Öcalanın tutulmasının ardından Murat Karayılan və Cəmil Bayıkla birlikdə PKK-nı idarə ediblər. 2004 və 2009-cü illərdə PKK Suriya qanadı olan JPG-yə komandanlıq edib. O, son olaraq TAK adlı şəbəkəni nəzarətində saxlayıb.
Azərbaycan İŞİD-çilərinin yeni görüntüləri yayıldı
Süfrə arxasında əyləşənlər arasında başqa millətlərdən olan “qardaşlar” var.
İŞİD sıralarında döyüşən azərbaycanlıların yeni görüntüləri yayılıb.
Ölkə.Az axar.az-a istinadən xəbər verir ki, görüntülər İŞİD üzvlərinin yemək yedikləri vaxt çəkilib.
İŞİD üzvlərini lentə alan şəxs özünün Azərbaycandan olduğunu deyir və bildirir ki, süfrə arxasında əyləşənlər arasında ərəb, özbək, tacik, qazax və başqa millətlərdən olan “qardaşlar” var.
İŞİD tədavülə buraxacağı sikkələrin şəklini yaydı
"İraq Şam İslam Dövləti" və ya sadəcə "İslam Dövləti" adlandırılan təşkilat, yaratdığı dövlətin növbəti atributlarından birini təqdim edib.
Terror təşkilatı imicindən çıxaraq dövlətləşməyi hədəfləyən İŞİD kağız pullardan imtina edərək təmiz qızıl və sikkələrdən ibarət yeni valyuta buraxacağını elan etmişdi.
Bu gün artıq İŞİD-ə yaxınlığı ilə tanınan bəzi internet saytlarında həmin sikkələrin fotoları yayılıb.
Çingiz Abdullayev İnterpolun fəxri səfiri seçildi
Azərbaycanın dünya şöhrətli detektiv yazıçısı Çingiz Abdullayev İnterpolun fəxri səfiri olub.
Bu barədə məktub Monakodan Azərbaycan daxili işlər naziri adına gəlib. Məktub İnterpolun rəhbəri adından daxil olub.
Qeyd edək ki, Azərbaycanın detektiv yazıçısı, nasir, publisist, Çingiz Abdullayev 1989-cu ildən Azərbaycan SSR Yazıçılar İttifaqının, 1991-ci ildən isə Azərbaycan Yazıçılar Birliyinin üzvüdür.
Hüquq elmləri doktoru olan yazıçı 2009-cu il aprel ayının 7-də Azərbaycanın ədəbi həyatında fəal iştirakına görə "Şöhrət" ordeni ilə təltif edilib. Onun 27 milyon nüsxədə olan 600-dən çox kitabı dünyada yayılıb. Çingiz Abdullayev 193 adda kitabın müəllifidir.
Prezident İlham Əliyev Macarıstana getdi
Azərbaycan prezidenti İlham Əliyev noyabrın 10-da Macarıstana işgüzar səfərə gedib.
Budapeştin Ferents List Beynəlxalq hava limanında Prezident İlham Əliyevi Macarıstanın yüksək vəzifəli dövlət və hökumət nümayəndələri qarşılayıblar.
Nəqliyyat işçilərinin maaşı artırıldı
Cari ilin doqquz ayında Azərbaycanın nəqliyyat müəssisələrində işləyən 74,5 min muzdlu işçinin 72,2 faizi dövlət müəssisələrində, 27,8 faizi özəl bölmədə çalışıb.
İşçilərin 51,2 faizi yerüstü və boru kəməri, 12,3 faizi su, 16,1 faizi hava nəqliyyatı, 20,4 faizi isə köməkçi və əlavə nəqliyyat fəaliyyəti göstərən müəssisələrdə işləyib.
2013-cü ilin yanvar-sentyabr ayları ilə müqayisədə nəqliyyatçıların orta aylıq əməkhaqqısı 1,7 faiz artaraq 538,9 manat olub, bu göstərici hava nəqliyyatında 786,2 manat, dəniz nəqliyyatında 736,8 manat, metro nəqliyyatında 587,2 manat, avtomobil nəqliyyatında 530,7 manat, dəmir yolu nəqliyyatında isə 254,9 manat təşkil edib. Əməkhaqqı metro nəqliyyatında 10,8 faiz, avtomobil nəqliyyatında 6,8 faiz, dəmiryol nəqliyyatında 5,2 faiz, dəniz nəqliyyatında isə 1,1 faiz artıb.
İnformasiya və rabitə müəssisələrində işləyənlərin sayı 27,1 min nəfər, bir işçinin orta aylıq əməkhaqqısı isə 10,2 faiz artaraq 736,7 manat olub.
MTN İŞİD-lə bağlı açıqlama yaydı
Bakıda İŞİD-çilərin “Baku Paintball Center”dəki atıcılıq meydanında hərbi baza yaratmaqları ilə bağlı yayılan məlumatlara münasibət öyrənmək üçün Ans Milli Təhlükəsizlik Nazirliyinə sorğu yollayıb.
Nazirliyin İctimai Əlaqələr Mərkəzindən sorğuya cavab olaraq bildirilib ki, yayılan informasiyaların heç bir əsası yoxdur.
“Azərbaycan Respublikasının milli maraqlarına və təhlükəsizliyinə mümkün təhdidlərin qarşısının alınması üçün bütün zəruri qabaqlayıcı tədbirlər həyata keçirilir. Əməliyyat şəraitinə nəzarət olunur”, - deyə bildirilib.
Qeyd edək ki, Bakıda İŞİD-çilərin yetişdirməsi barədə məlumat yayılıb. Yayılan məlumatlara görə, Bakı şəhərinin Keşlə qəsəbəsindəki “Baku Paintball Center”dəki atıcılıq meydanında İŞİD-çi dəstələrinin formalaşdırıldığı iddia olunur.
Yayılan məlumatlara görə, günün müəyyən zamanlarında sələfi təriqətinin nümayəndələri mərkəzin atıcılıq meydanında təlim keçirlər. Beləliklə də onlar gələcək döyüşlərə hazırlaşırlar.
Məsələyə aydınlıq gətirmək üçün “Baku Paintball Center” ilə əlaqə yaratdıq. Fikrət adlı şəxs ans press-ə açıqlamasında yayılan məlumatların yalan olduğunu deib.
“Elə şey olar ki, burada terrorçular məşq etsinlər, hüquq-mühafizə orqanlarının əməkdaşları xəbərsiz olsun? Yalan söhbətdir. Kimsə düşmənçilik məqsədilə belə xəbərlər yayır”, - deyə Fikrət bəy bildirib.
İrtan prezidenti Azərbaycana rəsmi səfərə gəldi
Ruhanini rəsmi şəxslər qarşılayıb.
İran İslam Respublikasının prezidenti Həsən Ruhani Azərbaycana rəsmi səfərə gəlib.
Ölkə.Az xəbər verir ki, apa-nın məlumatına görə, H.Ruhanini H.Əliyev Beynəlxalq Aeroportunda Azərbaycan baş nazirinin 1-ci müavini Yaqub Eyyubov və digər rəsmi şəxslər qarşılayıb.
Səfər çərçivəsində İran prezidentinin Azərbaycan prezidenti İlham Əliyev və digər rəsmi şəxslərlə görüşü, ikitərəfli əməkdaşlığa dair bir neçə sənədin imzalanması gözlənilir.
Hərbçilərimiz erməni vertolyotunu məhv etdilər
Azərbaycan Silahlı Qüvvələri Ermənistan Ordusunun vertolyotunu vurub.
Ölkə.Az bildirir ki, bu barədə “Qafqazinfo”ya məlumat cəbhə bölgəsindən daxil olub. Məlumata görə, bu dəqiqələrdə cəbhənin Ağdam istiqamətində, Çəmənli kəndinin ərazisində təmas xəttini pozan Ermənistan tərəfinə məxsus vertolyot vurulub.
Vertolyot Azərbaycan Ordusunun nəzarət etdiyi əraziyə düşüb və hazırda ərazidə tüstüləyir.
Azərbaycanın Müdafiə Nazirliyindən faktı “Qafqazinfo”ya təsdiqləyiblər. Əlavə məlumat veriləcək.
Məsələni dəqiqləşdirmək üçün Ölkə.Az Çəmənli kəndinin sakinləri ilə əlaqə saxlayıb.
Bölgədən bizə verilən məlumatda erməni vertolyotunun ordumuz tərəfindən vurulması xəbəri təsdiqləndi.
İstanbulda ABŞ əsgərlərinin başına torba keçirdilər
Ölkə.az türk mediasına istinadən xəbər verir ki, İstanbulun Eminönü rayonunda 3 ABŞ əsgərini başına torba keçiriblər.
Xatırladırıq ki, 2003-cü ilin iyul ayında Şimali İraqda türk əsgərlərinin amerikalılar tərəfindən başlarına torba keçirilmişdi.
Hadisə iki müttəfiq ölkə arasında çox ciddi bir diplomatik problem yaratmışdı.
Bu gün İstanbulda baş vermiş hadisənin amerikanların 2003-cü ildə türklərə qarşı etdikləri o alçaldıcı hərəkətə cavab olduğu bildirilir.
İsrail Azərbaycanı dəstəklədiyini bir daha bəyan etdi
Ölkə.Az İsrailin 9-cu kanalına istinadən xəbər verir ki, Behin-Sadat strateji tədqiqatlar mərkəzinin hesabatında bildirilir ki, İsrail və Azərbaycan müdafiə və energetika sahəsində aparıcı tərəfdaş olublar.
İsrailli nümayəndələrin fikrincə, iki ölkə arasında əlaqələr qarşılıqlı müqavilələr fonunda inkişaf edir: Bakı israil silahında, rəsmi Qüds isə azərbaycan neftində maraqlıdır.
2012-ci ildə İsrail Azərbaycanla 1,6 milyard dollar həcmində müxtəlif tip silahların satışı ilə bağlı müqavilə imzalayıb. Azərbaycan öz növbəsində, müşahidəçilərin fikrincə, təhlükəsizlik məsələlərində İsrailə hərtərəfli yardım göstərir. İlk növbədə bu İran tərəfindən gözlənilən nüvə təhlükəsinə aiddir.
"Müdafiə, kəşfiyyat, terrorla mübarizə sahələrində strateji əməkdaşlıq iki kiçik ölkənin qeyri-təhlükəsiz şəraitdə uğurlu əməkdaşlıq üçün imkanlar tapdığını nümayiş etdirir", - deyə, hesabatda bildirilir.
Xatırladaq ki, iki ölkə arasında münasibətlər uğurla davam edir və Azərbaycan-İsrail parlamentlərarası işçi qrupu fəaliyyət göstərir. İsrail Azərbaycan Respublikasının ərazi bütövlüyünü dəstəkləyir və Dağlıq Qarabağ münaqişəsinin sülh yolu ilə həllinə tərəfdardır. 2009-cu ildə Azərbaycana səfəri zamanı İsrail Prezidenti Şimon Peres ölkəsinin bu mövqeyini bir daha bəyan edib.
İŞİD və Əl-Nusra birləşdi
Suriyada İŞİD və Əl-Nusra təşkilatının rəhbərləri gizli şəkildə görüşərək Kobani üçün ortaq hərəkət etmək qərarı alınıb.
Ölkə.Az Associated Pressə istinadən xəbər verir ki, İŞİD və Suriyada Əl-Qaidə terrro təşkilat ilə əlaqədə olan Əl-Nusra noyabrın 2-si gizli görüş keçiriblər. Suriyanın şimalında reallaşdırıldığı deyilən gizli görüşdə təşkilatlar birlikdə hərəkət etmək və güclərini birləşdirmək haqqında qərar qəbul ediblər.
Gizli görüşün İŞİD-in 3 aydır ələ keçirməyə çalışdığı Kobanidə canlı qüvvə itirməsi zamanında edilməsi ABŞ və koalisiyanın təşkil etdiyi hücumların təşkilatı zəiflətməsi haqqında fikirləri gücləndirib
Qeyd edək ki, ABŞ-ın son hava hücumunda Əl-Bağdadinin olduğu konvoyun vurulduğu və İŞİD liderinin öldürüldüyü iddia edilmişdi.
Azərbaycanda snayper kursları açıldı
“Xanımların da bu kurslara cəlb olunmaları üçün müəyyən addımlar atılacaq”.
Azərbaycan Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) “Hərbi Vətənpərvərlik və Mütəxəssis Hazırlığı” MMC tərəfindən hərbi xidmət çağırışçıları üçün snayper kursları təşkil olunacaq.
Ölkə.Az xəbər verir ki, bu barədə AzVision.az-a xidmətin “Hərbi Vətənpərvərlik və Mütəxəssis Hazırlığı” MMC-dən məlumat verilib.
Cəmiyyətdən bildirilib ki, hazırda snayper kurslarının başlanması istiqamətində işlər davam etdirilir:
“Kursların başlaması ilə bağlı bütün hazırlıq işləri tamamlanıb. Hansısa bir güc strukturundan sifarişlər olsa kurslar başlayacaq. Qanunvericiliyə əsasən, Dövlət Sərhəd Qoşunları, Müdafiə Nazirliyinin Xüsusi Dövlət Mühafizə Xidməti və Daxili İşlər Nazirliyinin Daxili Qoşunlarından hər hansı bir sifariş verilərsə biz kurslara başlayacağıq. Kurslarda iştirak edəcək olanların sayı sifarişlərdən asılıdır”.
Cəmiyyətdən həmçinin bildirilib ki, Nazirlər Kabinetinin qərarı ilə snayper ixtisası üzrə kurslarda yalnız çağrışçılar iştirak edə bilərlər. 17 yaşına çatmış hərbi çağırışçı snayper kurslarına cəlb oluna bilər:
Cəmiyyətdən xanımların gələcəkdə snayper kurslarına cəlb olunması məsələsinə də aydınlıq gətirilib:
“Xanımların da bu kurslara cəlb olunmaları üçün gələcəkdə yəqin müəyyən addımlar atılacaq. Yəqin ki, bununla bağlı müəyyən təkliflər hazırlanar və Nazirlər Kabinetinə təqdim olunar. Amma hələ ki, belə bir təklif yoxdur”.
Türk general: Hər zaman Azərbaycanın yanındayıq
Zakir Həsənov türk ordu generalı Abdullah Atayı qəbul etdi.
Müdafiə naziri general-polkovnik Zakir Həsənov işçi səfərilə ölkəmizdə olan Türkiyə Respublikasının Jandarma Baş Komandanı ordu generalı Abdullah Atayı qəbul edib.
Ölkə.Az-ın Müdafiə Nazirliyinə istinadla verdiyi məlumat görə, müdafiə naziri general-polkovnik Z.Həsənov qonağı salamlayaraq Azərbaycanla Türkiyə arasında hərbi sahədə əməkdaşlığın daim yüksələn xətt üzrə artdığını, strateji tərəfdaşlıq və qardaşlıq münasibətləri əsasında qurulduğunu və əlaqələrin davamlı olduğunu qeyd edib.
Müdafiə naziri bölgədəki hərbi-siyasi vəziyyətə toxunaraq Ermənistan-Azərbaycan Dağlıq Qarabağ münaqişəsinin regional sabitliyə əsas təhlükə yaratdığını, problemin beynəlxalq hüquq norma və qaydalarına uyğun həllinə nail olunmasının vacibliyini vurğulayıb.
Ordu generalı Abdullah Atay da öz növbəsində səmimi qəbul üçün təşəkkürünü bildirərək, dövlətlərimizin əlaqələrinin qədim tarixi bazaya, mehriban dostluq, qardaşlıq münasibətlərinə əsaslandığını və Türkiyənin Azərbaycanın vacib tərəfdaşı olduğunu qeyd edib.
Görüşdə Türkiyə Respublikasının Azərbaycandakı hərbi attaşesi Hasan Nevzat Taşdeler iştirak edib.
Azərbaycan-Amerika Alyansı Vaşinqtonda möhtəşəm ziyafət verdi
“Bizim mədəniyyətimiz, bizim tariximiz əsrləri əhatə edir”.
Noyabrın 12-də ABŞ-ın paytaxtı Vaşinqton şəhərində bu ölkədə fəaliyyət göstərən Azərbaycan-Amerika Alyansının təşəbbüsü ilə 3-cü təntənəli ziyafət mərasimi baş tutdu.
Ölkə.Az xəbər verir ki, Endryu Mellon Auditoriyasında keçirilən və 600-dən çox qonağın qatıldığı mərasimdə ABŞ Konqresinin nümayəndələri, bu ölkədə fəaliyyət göstərən diplomatik korpus, analitik mərkəzlər, akademik və işgüzar dairələrin təmsilçiləri iştirak ediblər.
Azərbaycan-Amerika Alyansının təşəbbüsü ilə keçirilən builki – “Azərbaycanın gözəlliyi və təbiət möcüzələri” adlı sayca 3-cü təntənəli ziyafət mərasimi Azərbaycanın təbiət və mədəniyyət gözəlliklərinin təbliğinə həsr olunub.
Ziyafət mərasimini giriş sözü ilə açan Azərbaycan-Amerika Alyansının təsisçisi və rəhbəri Anar Məmmədov qonaqları salamlayaraq, onları təntənəli ziyafət mərasimində görməkdən şad olduğunu bildirib.
NATO Rusiyanı rəsmən hədəfə götürdü
Yens Soltenberg: "NATO Rusiya ilə sərhəddəki qoşunlarını gücləndirir"
Ölkə.az NATO-nun rəsmi saytına istinadən xəbər verir ki, alyans Rusiya ilə sərhəddəki bütün hərbi birliklərini gücləndirir.
"Biz Şərqi Avropadakı bütün qoşunlarımızı yüksək hərbi hazırlıq vəziyyətinə gətirmişik. NATO hər iki gündən bir hərbi birliklərini təlimlərə cəlb edir. Xüsusi təyinatlı briqadalarımız da yüksək döyüş hazırlığı vəziyyətindədir", saytın məlumatına görə, NATO-nun baş katibi belə deyib.
"Öz aqressiv siyasəti ilə Rusiya Avropada təhlükəsizliyin təməllirini birdəfəlik sarsıtdığına görə, NATO Ukraynadakı konfliktin həlli və onun bütün qitəyə sıçramasının qarşısını almaq üçün həmişə hazır olmalıdır", deyə Yens Soltenberq vurğulayıb.
Ölkə.az
