Tarixçi: "Ərdoğan bilmədiyini danışmaz"

Musa Qasımlı: "Xristofor Kolumb mövzusunda tədqiqat işlərinin aparılmasına ehtiyac olduğu qənaətindəyəm"

Millət vəkili, professor Musa Qasımlı Rəcəb Tayyib Ərdoğanın Amerikanın kəşf edilməsi barədə səsləndirdiyi fikrə münasibət bildirib.

Ölkə.az-a danışan professor bildirib ki, Türkiyə dövlətinin prezidenti heç bir zaman əsassız və ən mötəbər mənbəyə istinad etmədən danışmaz.

"Ənənəsi və böyük nüfuzu olan Türkiyə dövlətinin prezidenti heç bir zaman əsassız və ən mötəbər mənbəyə istinad etmədən danışmaz. Deyirsə, deməli, mənbə vardır. Qədim və orta əsrlər dövrü tarixi ilə məşğul olmadığımdan bu barədə ən mötəbər mənbələr əsasında danışmaq mənim üçün çətindir. Ancaq Xristofor Kolumbdan uzun illər əvvəl qədim türklərin Berinq boğazını keçərək Amerikanı kəşf etməsinə, bununla bağlı hətta xəritənin olmasına, bu qitədə yaşayan qədim tayfaların Novruz bayramını keçirmələrinə, dillərində bizin dilimizdəki bir sıra sözlərin ( məsələn, "təpə" və s.) olmasına dair məlumatları oxumuşam. Buna dair tədqiqat işlərinin aparılmasına ehtiyac olduğu qənaətindəyəm".

Xatırladaq ki, Rəcəb Tayyib Ərdoğan çıxışı zamanı Amerikanı Xristofor Kolumb yox, müsəlmanlar tərəfindən kəşf edildiyini iddia etmişdi.

Fatimə İbrahimova
Ölkə.az