Napoleonun papağı satıldı

Bonapartın əşyaları satışa qoyulub.

Ölkə.Az BBC-yə istinadən xəbər verir ki, tarixin unudulmaz sərkərdələrindən olan Napoleon Bonaparta məxsus geyim əşyaları Paris yaxınlığında yerləşən Fontenbloda hərraca çıxarılıb. Hərracda Napoleonun məşhur papağı 1 milyon 884 min avroya satılıb.

Monako şahzadəsinin sarayında saxlanılan bu papaq Bonapartın dünyada olan 19 geyim əşyalarından biri hesab olunur. Papağın alıcısı isə Koreyadan olan kolleksiya həvəskarı olub. O, sərkərdənin geydiyi papaqlardan birini 1 milyon 884 min avroya alıb. Məşhur sərkərdə bu papağını ilk konsul kimi 1800-ci ildə Marenqo döyüşündə olarkən geyinmişdi.

Xatırladaq ki, Napoleon Bonapart Fransa imperatoru, bacarıqlı sərkərdə, Fransa inqilabi ordusunun generalı, Fransa Respublikasının birinci konsulu olub. O, Müqəddəs Yelena adasında ikən öz memuarlarını yazıb və səhhətinin get-gedə pisləşməsilə 5 may 1821-ci ildə vəfat edib. Meyitinin yarılmasından sonra məlum olub ki, o, qanaxma ilə fəsadlaşmış mədə xərçəngindən vəfat edib. Bu günə qədər onun zəhərlənməsi ilə bağlı iddialar təsdiqini tapmayıb.

Rəşid Mustafazadə

Ölkə.Az