Facebookdan növbəti xeyirxah addım

Afrika ödənişsiz internetlə təmin edəcək

Ölkə.Az ABŞ mətbuatına istinadən xəbər verir ki, Facebook və Avanti telekommunikasiya şirkətinin yeni layihəsinə əsasən, Afrika əhalisi ödənişsiz internetlə təmin olunacaq.

Adıçəkilən şirkətlərin nümayəndələri bu məlumatı şərh etməkdən imtina etsələr də, bildirilir ki, Avanti telekommunikasiya şirkəti Afrika üzərində iki rabitə peyki nə malikdir və yaxın zamanda daha iki peyk aparatının buraxılması gözlənilir. Qeyd edək ki, Facebook şirkətinin rəhbəri Mark Zukerberq bir sıra çıxışlarında üçüncü dünya ölkələrinin internetlə təmin olunmasının vacibliyini vurğulayıb.

Xatırladaq ki, yaxınlarda Facebook sosial şəbəkəsi Ebola”virusundan əziyyət çəkən insanlara yardım məqsədilə yeni xidmət istifadəyə verməyə hazırlaşdığını bəyan etmişdi. Belə ki, milyonlarla istifadəçisi olan sosial şəbəkənin səhifəsində xüsusi yardım düyməsi yerləşdiriləcəkdi. Maddi yardım etmək istəyən hər bir istifadəçi həmin düyməni basmaqla virusa qarşı mübarizə fonduna vəsait yatıra biləcəkdi.

Rəşid Mustafazadə

Ölkə.Az