Palçıq atmaq, arvadını çiynində daşımaq

"Ölkə.Az" bu gün oxucularını dünyanın ən qəribə festivalları ilə tanış edir.

Hindistanda Holi rəng festivalı

Hindistanda hər il yazın gəlişi ilə əlaqədar rəng festivalı keçirilir. Tədbirlər fevralın sonu, martın əvvəli başlayır və 2-3 gün davam edir. Yerli sakinlər gəzintiyə çıxır, bir-birinə su və rəngli ədəvalar atırlar.  İnanca görə isə sifəti və paltarı daha çox rəngə bulaşan insanın növbəti ili daha firavan və uğurlu keçəcək. Holi bayramı artıq Avropa ölkələrində də populyarlıq qazanıb. Məsələn, Portuqaliyada və Almaniyada da bu tip festival keçirilir. Amma Avropa ölkələrində bu bayram yaz mövsümü ilə əlaqəli deyil. Sadəcə bir əyləncədir.

İspaniyada keçirilən "La Tomatina" festivalı

İspaniyanın Bunyol şəhərinin küçələri avqustun son həftəsində qırmızı rəngə boyanır. Buna səbəb isə "La Tomatina" festivalıdır. Festivalda iştirak edənlər bir-birini pomidor atəşinə tutur. 30 mindən çox şəhər sakini festivalda iştirak edir. Qonşu şəhərlərdən də tədbirə qoşulanlar olur. Bunyola gətirilən 50-60 ton pomidor "savaş"ın əsas "gülləsi" sayılır. Bir neçə gün ərzində festival iştirakçıları bir-birini atəşə tutur. Amma şəhərin təmizlənməsi hökumətə baha başa gəlir. Məsələn, 2016-cı ildə şəhərin təmizlənməsinə 30 min avro xərclənib.

Cənubi Koreyada palçıq festivalı

Cənubi Koreyanın Borionq şəhərində iyulun ikinci həftəsi qeyd edilir. Bu festival ilk dəfə 1998-ci ilddə təsis edilir. Festival iştirakçıları bir-birinə palçıq atırlar. Hətta küçədən təsadüfən keçənlər də palçıq atəşinə "qonaq edilir". Qısa müddət ərzində yerli əhali arasında populyarlaşan palçıq festivalı xarici turistlərin də diqqətini cəlb edir. Festivalda ancaq müalicəvi palçıqdan istifadə edilir.

Taylandda keçirilən Ban-Banq-Fay festivalı

Hər il may ayının əvvəli Tayland sakinləri "Ban-Banq-Fay" festivalı keçirirlər. Bu festival çərçivəsində səmaya raket buraxılır. İştirakçılar metal, taxta və plastik materialdan raketlər hazırlayırlar. Bununla da yağış tanrısı Vassakanın etimadını qazanmaq istəyirlər.

Finlandiyada arvadını çiyində daşımaq festivalı

Festivalda adətən ailəli cütlüklər iştirak edir. Avqust ayının sonlarında keçirilən festivalda ər bütün maneələrə baxmayaraq arvadını çiynində aparmalıdır. O, dağa qalxa bilər, çaydan keçə bilər və ya bir neçə dəfə oturub-dura bilər.

Yaponiyada keçirilən Xadaka matsuri festivalı

Festival Yaponiyada iki dəfə-qışda və yayda keçirilir. Festival iştirakçıları minimum sayda paltar geyinirlər. Bu səbəbdən bir çoxları bu festivalı "çılpaq festival"  adlandırır. İştirakçılar bir-birinə su atır. Yaponların iddiasına görə bu yolla onlar mənəvi cəhətdən təmizlənirlər.

Pxuket adasında vegetarianlar festivalı

Sentyabrın sonu, oktyabr ayının əvvəllərində Pxuket adasında ən qəribə və ekstremal festivallardan biri keçirilir. Festival iştirakçıları özlərinə xəsarət yetirirlər. Onların fikrinə görə, od üzərində yerimək, bədənini çapmaq və pirsinq taxmaq tanrıların xoşuna gələcək və onları ölümdən xilas edəcək.

Bu tədbirlərdə əsasən çinlilər iştirak edirlər. Onların inancına görə yerdəki günahlarına görə könüllü surətdə ağrı hiss etmək ruhu təmizləyir. Festival ərəfəsində iştirakçılar ciddi pəhriz saxlayırlar. Onlar ət və heyvan mənşəli qida yemirlər. Təmizlik rəmzi olaraq ağ rəngli paltardan istifadə edirlər.

Hikmət
Ölkə.Az