Titanik faciəsi ilə Misir mumiyasının əlaqəsi

"Ölkə.Az" bu gün oxucularına XX əsrin əvvəllərində baş verən bu faciə ilə bağlı yeni versiyanı çatdıracaq.

XIX əsrin 80-ci illərində arxeoloqlar Misirin Qahirə şəhəri yaxınlığında yeni mumiya tapdılar. Bu mumiya  IV Amenhotepin dövründə yaşayan bir kahinə məxsus imiş. Tezliklə Qədim Misirə aid eksponatların kolleksiyası ilə məşğul olan bir ingilis mumiyanı ələ keçirir. Aldığı sarkofaqla İngiltərəyə qayıdan kolleksioner sarkofaqın qapağına çəkilmiş kahinin təsvirini fotolentə köçürmək qərarına gəlir. Foto lenti yuyan fotoqraf bildirir ki, fotoplastin üzərində naməlum qadın siması peyda olub və qadının hədələyici sifəti var. Xürafatçı ingilis mumiyanı Britaniya muzeyinə hədiyyə edir.

Hadisədən bir həftə sonra hədiyyəni muzeyə qəbul edən muzey işçisi qəflətən dünyasını dəyişir. Onun köməkçisi yıxılaraq ciddi zədələnir. Mumiyanın fotosunu çəkən fotoqraf isə evə qayıdanda faciə ilə üzləşir. Metronun qapısı onun barmaqlarını qırır. Amma bu hələ başlanğıc idi. Mumiya ilə bu və ya digər yolla əlaqəli olanların hamısının başı üzərində qara buludlar fırlanırdı.

Mumiya haqqında məqalə yazan jurnalist ağır xəstəlikdən vəfat edir. Kahin barədə ağzına gələni deyən muzey ziyarətçisi işdən qovulur. Onun biznesmen oğlu müflis olur və dəlixanaya göndərilir. Misirdə də mumiyanı narahat edənləri faciə gözləyirdi. Sarkofaqı qazıb çıxaran arxeoloqun əlində açılan tüfəng qolunu ciddi zədələyir. Muzey rəhbərliyi mumiyanı zirzəmidə gizlədir. 

Bir müddət sonra amerikalı kolleksioner mumiyanı almaq qərarına gəlir.  Muzey əməkdaşları eksponatı ona təhvil verirlər. Lord Kentervil kahinin mumiyasını okeanın o tayına, yeni sahibinə təhvil verməli idi. Amerikaya ən tez zamanda yola düşən layner isə "Titanik" idi. Belə dəyərli yükü kapitan körpüsünün yaxınlığına qoymaq qərarına gəlirlər.

Deyilənlərə görə, kahin burada da onun rahatlığını pozan insanlardan qisas almaq qərarına gəlir. Faciədə sağ qalanlar iddia edir ki, aysberqlə toqquşmadan əvvəl gəmi kapitanı Smit mumiyaya baxmaq qərarına gəlir. Bir çoxlarının fikrinə əsasən, məhz bu görüş kapitana pis təsir edir. Mumiyaya baxdıqdan sonra kapitan özünü qəribə aparır, çoxsaylı aysberqlər barədə xəbərdarlığa baxmayaraq, sürəti aşağı salmır. Çox güman ki, bu da bir versiyadır. Amma mumiya ikinci dəfə sakitçiliyə çəkilir. Bu dəfə onun yeri Misir yox, Atlantik okeanının dibi idi...

Hikmət
Ölkə.Az