ABŞ prezidentlərinin ölüm sirri

"Ölkə.Az" bu gün oxuculara bu barədə məlumat verəcək.

Tekumse 32 cəmiyyətin döyüşçülərini birləşdirərək tayfalar konfederasiyası qurur. Bu konfederasiyanın liderləri 1809-cu ildə ABŞ hökuməti ilə hindu tayfa başçılarının imzaladığı sərəncamı qəbul etmirdilər. Bu sənədə əsasən hindular 3 milyon akr torpaq ərazisini Ştatlara bağışlayırdılar. Amma müqavilə imzalanmadan əvvəl hindu liderlərinə qarşı hiylə qurulub. Belə ki, hindu tayfa başçıları arağa qonaq edilmişdi.

Tekumse general Uilyam Henri Harrisonla danışıq vaxtı bildirirdi ki, müqavilə hiylə yolu ilə imzalanıb və tanınmamalıdır. Cavabında isə general hindu liderə bildirir ki, öz işi ilə məşğul olsun, eyni zamanda Konfederasiya rəsmi olaraq təsdiqlənməyib. Bu səbəbdən Tekumse bütün hindu tayfalarının maraqlarını təmsil edə bilməz.

1811-ci ildə hinduların kütləvi üsyanı başlayır. Şimali Amerikada nəzarəti itirən İngiltərə hinduları dəstəkləyir. Britaniya ordusunun generalı Brok hindularla ittifaq quraraq amerikalılar üzərində bir neçə qələbə qazanır.

Amma döyüşlərin birində həlak olur. General Prokter isə istedadlı sərkərdə olmadığı üçün ingilis qoşununu geri çəkir və hindular ABŞ ordusu ilə üz-üzə qalır. Temza çayı üzərində 1813-cü ilin 5 oktyabr tarixində baş verən savaşda Tekumse ələ keçir və dəhşətli edama məruz qalır. ABŞ ordusu onun dərisini soyur.

Bir versiyaya görə Tekumse ölümündən əvvəl ABŞ prezidentlərini lənətləyir. O, deyir ki, sonu sıfırla bitən tarixdə seçilən ABŞ prezidentləri ya öləcək, ya da qətlə yetiriləcək.

1840-cı ildən başlayaraq 100 il ərzində bu lənət öz işini görür.

1840-cı ildə Uilyam Henri Harrison prezident seçilir. O, innauqurasiyasından bir ay sonra ağ ciyər xəstəliyindən vəfat edir.

1860-cı ildə Avraam Linkoln prezident seçilir. 1864-cü ildə təkrar seçilən Linkoln 1865-ci ildə teatrda qətlə yetirilir.

1880-ci ildə Ceyms Harfild prezident seçilir. 1881-ci ilin 2 iyul tarixində kürəyindən güllə yarası alır və 2 ay sonra ölür.

1900-cü ildə prezident Uilyam Mak-Kinli ikinci müddətə prezident seçilir. 1901-ci ildə isə anarxist Çolqoş tərəfindən ağır yaralanır. Bir neçə gün sonra isə dünyasını dəyişir.

1920-ci ildə prezident Uorren Qardinq seçilir. 1923-cü ildə isə insult səbəbindən vəfat edir.

1940-cı ildə Franklin Ruzvelt üçüncü dəfə prezident seçilir. 1945-ci ilin 12 aprel tarixində beyin qansızmasından vəfat edir.

1960-cı ildə Con Kennedi prezident seçilir. 1963-cü ildə isə Dallasda qətlə yetirilir.

Bu lənət təkcə Reyqana təsir etmir. 1980-ci ildə prezident seçilən reyqan 2004-cü ildə 93 yaşında vəfat edir.