Azərbaycanlı rejissor: "Bozun Əlli Çaları"na baxmayan bozun əlli çalarını itirər"

Tamaşaçıların böyük marağını qazanan “Bozun 50 çaları” filmindən Şimali Qafqaz kinoteatrları imtina ediblər. Səbəb isə burada müsəlmanların etirazıdır.

Ölkə.az-a danışan tanınmış rejissor Kənan MM (Mahmudov) müsəlman ölkələri tərəfindən filmin qadağan edilməsini normal qarşılasa da, film barədə bir neçə fikir səsləndirib.

"Kino siyasətdir və müsəlman ölkələrində qadağan olunması normaldır. Ümumilikdə film rejissorun xəyallarının şah damarının, yuxusuz gecələrinin yaşamaq istəyib yaşaya bilmədiyi və yaxud heç bir zaman ola bilməyəcək hadisələrinin görmək istədiyi ekran versiyasıdır. Və hər bir kino yalandı. Bilirsiniz kino millətin və vətəndaşın mədəniyyətidir. Və ən asas pul varsa, kino da var.

"Bozun Əlli Çaları"na gəlincə, film kino sevənlər üçün normaldır, ancaq millət üçün deyə bilmərəm. Mən heç bir filmə tamaşaçı kimi baxmıram.

Məncə, "Bozun Əlli Çaları"na baxmayan bozun əlli çalarını itirər".

Qeyd edək ki, sözü gedən film 2011-2012-ci illərdə britaniyalı yazıçı E.L.Ceyms tərəfindən yazılmış dünyaca məhşur olan eyniadlı əsər üzrə lentə alınıb.

Əsər tələbə milyarder Kristian Qreyin münasibətləri haqqındadır. Filmin bir hissəsi isə erotik səhnələrdən ibarətdir.

Fatimə İbrahimova
Ölkə.az