Azərbaycan Milli Kitabxanasında görüş

Fevralın 17-də Polşanın antiplagiat kompaniyasının prezidenti Sebastyan Kavçinski və Bakı ofisinin direktoru Əli Təhməzov M.F.Axundzadə adına Azərbaycan Milli Kitabxanasında olublar.

Azərbaycan Milli Kitabxanasının direktoru Kərim Tahirov rəhbərlik etdiyi qurum haqqında, onun elektron resursları barədə qonaqlara məlumat verib.

Polşanın antiplagiat kompaniyası haqqında danışan S.Kavçinski bildirib ki, 2002-ci ildən fəaliyyət göstərən kompaniya Moldova, Almaniya, Rumıniya, Polşa və digər Avropa ölkələrində, Cənubi Amerikada fəaliyyət göstərir və 200-dən artıq müştərisi var.

Azərbaycanın onlar üçün çox maraqlı ölkə olduğunu vurğulayan S.Kavçinski burada da fəaliyyət göstərməyi düşündüklərini söyləyib. Antiplagiat kompaniya artıq Azərbaycanda Ali Attestasiya Komissiyası, Tələbə Qəbulu üzrə Dövlət Komissiyası, Təhsil Nazirliyi və bir neçə ali təhsil ocaqlarının rəhbərləri ilə görüşüb və antiplagiatlıq üzrə Azərbaycanın milli proqramlarını təklif ediblər. Kompaniyanın hazırladığı proqramlar təhsil müəssisələrində, nəşriyyatlarda, kitabxanalarda intellektual mülkiyyətin qorunmasına, sənədlərdə plagiat faylların aşkar olunmasına xidmət edir. Proqramlar hər hansı dildə plagiatı müəyyən etmək imkanına malikdir.

Görüşün sonunda K.Tahirov proqramla ətraflı tanış olacağını, proqramların Azərbaycan Milli Kitabxanası üçün əhəmiyyətini araşdıracağını bildirib./Azərtaz/

Ölkə.Az