Cabbar Musayev Niyaməddin Musayevdən oğurluq edibmiş?

Son zamanlar istər ciddi janrda, istərsə də mahnı janrında bir-birinə oxşayan bəstələrin sayı artıb. Amma sən demə, belə "ənənə" hələ 20-30 il öncədən yaranıbmış.

Ölkə.Az xəbər verir ki, Niyaməddin Musayevin ifa etdiyi "Səni unutmaqdan ötrü" mahnısıyla Nazpəri Dostəliyevanı geniş tamaçaşı auidotoriyasına tanıdan "Nə olar Allahım"ın da girişi demək olar ki, eyniymiş.

Qeyd edək ki, "Nə olar Allahım" mahnısının sözləri mərhum şairimiz Nüsrət Kəsəmənliyə, musiqisi Niyaməddin Musayevin qardaşı oğlu Cabbbar Musayevə aiddir.

Əməkdaşımız məsələ ilə bağlı Niyaməddin Musayevlə əlaqə saxlayıb. Niyaməddin Musayev bildirib ki, sözləri Cabir Novruza aid olan "Səni unutmaqdan ötrü" mahnısını 1990-cı ildə yazıb. Amma maraqlıdır ki, xalq artisti bu mahnıların xüsusən girişində eyniliyin olmasını inkar edir: "Eyni deyil. Heç bir aidiyatı yoxdur".

Adının çəkilməsini istəməyən digər tanınmış bəstəkar isə deyir ki, ümumiyyətlə, bu iki şəxsin bəstələrində böyük oxşarlıqlar var: "O cümlədən bu mahnılarda da oxşarlıq böyükdür. Yəni, stil oxşarlığı, üslub bənzərliyi var. Bu mahnıların başlanğıcında isə yaxınlıq daha çoxdur. Sadəcə, "Nə olar Allahım" daha şirindi".

Xatırladaq ki, "Nə olar Allahım" 1995-ci ildə yazılıb. Sonda hər iki mahnının oxşar, yaxud eyni hesab etdiyimiz yerlərini təqdim edirik.

İntiqam VALEHOĞLU

Ölkə.az