Əməkdar artist: “Həyatımda olan insan məndən 12 yaş balacaydı”

O, bir çox nəğmələrin sözün əsl mənasında mahir ifaçısıdır. Amma nədənsə əksəriyyət onu məzəli mahnılarla daha çox qəbul edir. Söhbət əsnasında bunun niyə məhz belə olduğunu özüm üçün dəqiqləşdirdim və istərdim ki, siz də biləsiniz. Bu xanım gileylənməyin, o cümlədən şikayətlənməyin nə olduğunu bilmir və ona görə də müsbət enerjisini öz tamaşaçısı ilə paylaşmağı bacarır. Beləliklə, Ölkə.Az-ın suallarını respublikanın əməkdar artisti, tanınmış müğənni Ruhəngiz Musəvi cavablandırır.

- Ruhəngiz xanım, başlayaq yaradıcılığınızdan. Hansı yenilikləriniz var?

- Hazırda retro mahnılara daha çox üstünlük verirəm. Onların gözəlliyinə, melodiyasına xələl gətirməmək şərtilə yeni aranjimanda lentə yazdırıram. Çox şükür ki, hələ də müğənni kimi sevilirəm.

- İndi işlədiyiniz bəstəkarlar var?

- Əməkdar incəsənət xadimi, bəstəkar Nailə Mirməmmədli ilə bir neçə mahnı hazırlamışıq. Nailə xanımla bu yaxınlarda danışdıq. Deyir ki, gəl, bir neçə mahnı da işləyək. Eldar Mansurovdan da bir mahnı ifa etmişəm.

- İndiyə kimi bir çox janrlarda ifalarınız olub. Amma insanlar sizi Tofiq Quliyevin bəstəsi olan “Məzəli mahnı” ilə yadda saxladılar. Bəlkə digər mahnıları yaxşı ifa etməmişdiniz, yaxud bu bəstəni çox yaxşı ifa etmişdiniz?

- Kim, mən? Ondan əlavə çox mahnılar ifa etmişəm.

- Bəs niyə bu mahnınız sevildi? Bəlkə obrazınıza uyğun gəldiyi üçündür?

- Bəli, elədir. O mahnını bizim dünya şöhrətli sənətkarımız Zeynəb Xanlarova da oxuyub. Ancaq deyim ki, 70-ci illərdə rəhmətlik Tofiq Quliyev mənə demişdi ki, qızım, bu mahnı sənin səsinə, obrazına daha uyğundur. Ümumiyyətlə, şux, ritmik mahnını oxuyursansa, ona obraz verməyi də bacarmalısan. O da ki məndə alınıb (gülür). Ondan başqa Ələkbər Tağıyevin xalq şairi Nəriman Həsənzadənin sözlərinə yazdığı “Gül bir az” mahnısı var. O mahnını da Nisə Qasımova oxumuşdu. Bu barədə heç yerdə danışmamışam. Həmin illərdə Ələkbər Tağıyevin “Leylam” adlı mahnısını oxuyurdum, məni efirdə görüb dəvət etdi. “Leylam” da Nisə xanımın ifasında səslənmişdi. Qarmon ifaçısı Kamil Vəzirovun qardaşı Baba Salahovun ansamblında pianoçu idi. Dedi ki, Ələkbər müəllim səni axtarır. Çox sevindim. Orda özü dedi ki, mənim bir neçə mahnımı ifa etməyini istəyirəm. Həmin mahnıların siyahısı və Ələkbər Tağıyevin imzası da məndə var. Amma o silsilə mahnılardan da ən yadda qalanı “Gül bir az” oldu.

- İndiyə kimi sizi kiminləsə qalmaqal etdiyinizi görməmişəm...

- Niyə qalmaqal etməliyəm ki?

- Sözümün canı var. Sizin yaşıdlarınız qalmaqal edirlər. Soruşmaq istədiyim budur ki, bu qalmaqallardan kənarda qalmağı necə bacarırsınız? Ya çox ağıllısınız, ya da ehtiyatlı.

- Mən xoşuma gələni qəbul edirəm. Əgər kiminləsə sözüm çəp gəlibsə, efirdən kənarda deyirəm. Axı mən niyə qalmaqal etməliyəm, kiminsə paxıllığını çəkməliyəm? Allah mənə özümə görə məlahətli səs verib, yaşıma görə hələ də yaxşı xarici görünüşüm var. Mənə elə gəlir ki, bu qalmaqallar paxıllıqdan irəli gəlir. Sizə bir söz deyim, amma düz başa düşün. Sənətdə olsam da, elə bil ki, bu sənətin adamı deyiləm.

- Xarakter olaraq?

- Bəli.

- Müğənnilərdə hansı xasiyyət olur ki, sizdə o yoxdur?

- Kiminləsə rəqabət aparmıram, paxıl deyiləm. Kim nə uğur qazanırsa, sağlığına qiymət.

- Adətən yaşlı sənətkarlar gəncləri sıxışdırırlar. Sizə qarşı belə şeylər ediblər?

- Mən Allahıma şükr edirəm. O vaxt oxuyan da az idi. Ən gənc müğənni idim.

-İlk dəfə səhnəyə çıxanda neçə yaşınız var idi?

- Doqquzuncu sinfə keçəndən səhnədəyəm. Rəşid Behbudovun Mahnı Teatrında işləməyə gəldim. Sumqayıtda Oqtay Kazımovun estrada orkestrinin məşqlərinə gedirdim. Mərhum xalq artistimiz Eldar Axundov mənim tərəf müqabilim olub.

- Çoxları elə bilir ki, siz də “Lalə” qızlar ansamblının solisti olmusunuz...

- Ruhəngiz Allahverdiyeva olub, mən yox. Efirə ilk dəfə Baba Salahovun ansamblı ilə çıxmışam. Canlı konsert proqramı idi. Ondan sonra Oqtay Kazımovla Gülarə Əliyevanın evinə getdik və mən “Dan ulduzu”na qəbul olundum.

- Fəxri adı neçənci ildə almısınız?

- 2007-ci ildə.

- Bir çox festivalların iştirakçısınız. Hətta bildiyimə görə bir dəfə də Azərbaycan gözəli seçilmisiniz.

- Əvvəl belə müsabiqələrə dövlət tərəfindən göndərilirdik. 1973-cü ildə Almaniyada Gənclərin Ümumdünya Festivalında olmuşam. İlk xarici səfərim 1972-ci ildə Rəşid Behbudovla olub. 1976-cı ildə isə Aralıq Dənizi səyahəti zamanı Azərbaycan gözəli seçildim. Halbuki müğənni kimi getmişdim. Həmin vaxt biz dünyanın bir çox ölkələrinə səyahət etmişdik

-Toylara gedirsiniz?

- Gedirəm. Hətta bir neçə ailələr var ki, bütün qohumlarının toyunda mən oxuyuram. Ruhəngiz Musəvi Azərbaycanda ilk kampaniya müğənnisidir.

- Bir müğənnidən eşitmişdim ki, məşhur musiqiçilərimizdən biriylə sevgi macəranız olub.

- Siz nə danışırsınız? Mənim öz yoldaşım musiqiçi olub, filarmoniyada işləyib. O vaxt çoxlarının Ruhəngizə simpatiyası var idi.

- Sizin kiməsə simpatiyanız olmayıb?

- Xeyr, heç vaxt. Cavanlıqda sənət aləmində çoxlarının mənə simpatiyası var idi.

-Yoldaşınız sizi qısqanırdı?

-Yox, biz evlənəndə mən müğənni idim.

- Sonra da ayrıldınız.

-Bəli.

- Bəs ondan sonra?

- Ondan sonra bir nəfərlə vətəndaş nikahında yaşadım. Amma indi bir yerdə deyilik.