Bu film Azərbaycan kinosunda "Hollivud" havası əsdirəcək

Azərbaycanda mutantların gənclərə hücumu gözlənilir.

Amma bu, real həyatda yox, rejissor Namiq Əlioğlunun çəkdiyi "Qorxu altında" filmində baş verəcək. Bu barədə Ölkə.Az-a "N. A Media"nın moderatoru Nigar Şamilbəyli məlumat verib. Onun sözlərinə görə, film tərbiyəvi və maarifləndirici xarakter daşıyır. Əsas mövzu kimi gənclərin narkomaniyadan çəkindirilməsi və bu bəlanın yaratdığı fəsadlardan törəyən "mutant"ların insanlara qarşı olan münasibətlərindən bəhs edilir:

"19-22 Mart tarixlərində “Qorxu Altında” filminin birinci seçim turu keçirildi. Seçimə 450 nəfərdən artıq iştirakçı qatılmışdı və münsiflər heyəti onlardan 97 nəfəri seçərək ikinci tura dəvət etdilər. İkinci turda isə 97 nəfərdən 50 nəfər filmdə rol almaq şansını qazandı. Rejissoru və ssenari müəllifi Namiq Əlioğlu olan bu film Azərbaycan üçün yenilikdir".

Qeyd edək ki, filmdə hadisələr təbiət qoynunda cərəyan edir. Təbiətin qoynuna ad günü qeyd etməyə gələn bir neçə gənc həmin meşədə yaşayan "honibal mutant" ların təcavüzünə məruz qalaraq yaşamaq üçün mübarizə aparmağa başlayırlar. Həyatda əyləncə üçün yaşayan gənclər sağ qalmaq uğrunda mübarizə apararkən son anda həyatı dərk etdiklərini anlayırlar.

N. Şamilbəyli onu da qeyd edib ki, “ Qorxu Altında ” filminin Bakı şəhəri və Azərbaycanın müxtəlif bölgələrində çəkilməsi planlaşdırılıb:
"Çəkimlər may və iyun ayları üçün nəzərdə tutulub. Sentyabr və ya oktyabr aylarında isə artıq bir çox kinoteatr ekranlarında film izləyicilərin ixtiyarına veriləcək".

Xatırladaq ki, filmin informasiya dəstəkçisi Ölkə.Az saytıdır.

İntiqam VALEHOĞLU
Ölkə.Az