\"Azdrama\"da \"Eşq və İntiqam\" biabırçılığı

İntiqam VALEHOĞLU

Aprelin 27-də Bakıda yaşayan bütün mingəçevirlilər Akademik Milli Dram Teatrına yığışmışdı. Səbəb də o idi ki, Mingəçevir Dövlət Dram Teatrı "Eşq və İntiqam" tamaşasını "Azdrama"da təqdim etməliydi. Bizi də dəvət etmişdilər. Getdik, baxdıq və güldük.

Tamaşa haqda qısaca nəsə deməli olsaq, əvvəlcə onu qeyd etmək lazımdır ki, belə bərbad işin Bakıya, xüsusən də "Azdrama" səhnəsinə qədər gətirilib çıxarılması sadəcə, ayıbdır.

Şəxsən mən və yanımda əyləşən bəzi həmkarlar tamaşanın ortasına qədər kimin kim olduğunu anlaya bilmirdik. Pafos isə yüksək səviyyədə. Aktyorlar pıçıltını da bağıra-bağıra deyirlər. Tamaşada Cəbi obrazı var. Yazıq aktyoru elə qrimləyiblər ki, elə bilirsən Novruz bayramındakı keçəldir.

Başqa bir maraqlı məqam. Deməli, iyirmi il keçir və Piri baba heç dəyişmir, həyətdəki ağacdan asılmış tüfəng isə öz yerində qalıb. Həyətdəki naməlum ağac da ilin bütün fəsillərində yaşıllığını qoruyub saxlayıb. Yeri gəlmişkən, reklam olsa da deyim ki, həmin tüfəngdən "Sədərək" bazarında 5 manata görmüşəm. Amma rejissora halaldı. Piri babaya nə yedizdirmişdisə, iyirmi il keçsə də, kişinin yanağından qan damlayırdı.

Başqa bir epizodda qız Piri babaya əskinin arasında kirpi gətirir. Kirpinin də tikanları guya əskidən bayıra çıxıb. Sizi bilmirəm, amma mən göy rəngdə kirpi görməmişəm. Bəlkə də var ha, amma mən rast gəlməmişəm.

Həcər xanımı oynayan əməkdar artist Ella Yaqubova tamaşa ərzində 5-6 dəfə libasını dəyişir. Çox gözəl. Aktyor səhnədə nə qədər baxımlı görünsə, o qədər yaxşıdır. Bəs digərləri aktyor deyillərmi? Açıq-aşkar hiss olunur ki, səhnədə belə gənc aktyorlar bu aktrisadan çəkinirlər, ona xüsusi münasibət var. Amma maşallah, onun da səhnədə qışqırmağına söz ola bilməzdi.

Beləcə, tamaşanın xeyli hissəsinə baxırıq, gülürük. Amma məndən solda əyləşən aktyor Yadigar Muradov çox diqqətlə baxır. Deyəsən nəsə ciddi yenilik var. Sonra bizə iradını bildirir, ardınca xanım jurnalisti təhqir edir. Jurnalist yerini dəyişir, bir az sonra mən də zalı tərk edirəm. Aşağı düşürəm. Amma aktyorlar necə qışqırırlarsa, səs birinci mərtəbəyə də gəlib çatır. Hətta "Azdrama"nın qarşısından keçənlət də ayaq saxlayıb qulaq asırlar bu biabırçılığa...Beləcə "Eşq və İntiqam" biabırçılığı sona çatır.

Heç axarıncı olmasın!

P.S. Mingəçevir Dövlət Dram teatrının rəhbəri Səxavət Məmmədov və kollektivin bəzi üzvləri ilə normal münasibətlərimiz var. Amma bu yazıya görə inciyəcəklərsə, mənimçün həmin münasibət yoxdur. Çünki birinci mən incimişəm, belə tamaşaya iki saat vaxtımı sərf etdiyimə görə.

Ölkə.Az