Firəngiz Mütəllimova: \"Ona görə də iki doğum günüm var\"

Bu gün Akademik Milli Dram Teatrının tanınmış aktrisası, xalq artisti Firəngiz Mütəllimovanın doğum günüdür.

"Xanımdan yaş, kişidən maaş soruşmazlar" prinsipinə əsaslanaraq səbəbkarın yaşını da açıqlamıram. Onsuz da bilənlər bilir.

- Firəngiz xanım, ilk təbriki kimdən aldınız?

- Məni ilk təbrik edən ailə üzvlərim oldu. Amma əslində doğum günün aprelin 3-dədir. Ona görə də bəziləri aprelin 3-də, bəziləri mayın 1-də təbrik edirlər.

- Niyə belə olub ki?

- Elə uşaq vaxtı belə yazdırıblar, qalıb. Ona görə də iki doğum günüm var (gülür).

- Belə başa düşdüm ki, bu günü doğum günü kimi qeyd etmirsiniz...

- Əksinə həmişə mayın 1-də doğum günümü qeyd edirəm. Amma bu dəfə belə olmayacaq. Çünki işlərim, dərslərim çoxdur. Ayın istənilən günündə qeyd edə bilərəm. Nə fərqi var e, əsas odur doğulmuşuq (gülür).

- Yaşlanmaq, qocalmaq qorxunuz var?

- Əsla elə qorxum yoxdur. Şükür edirəm ki, salamatçılıqdır. İnsan yaşlanmalıdır, bu, həyatın qanunudur.

- Gözəlliyiniz itirməkdən qorxmursunuz?

- Əksinə, insan yaşa dolduqca əgər daxili safdırsa, üzünə nur gəlir.

- Şuşa ilə bağlı memuar xarakterli kitab yazmalıydınız. Başlamısınız?

- Artıq kitabı yazmağa başlamışam. Demək olar ki, yarısını yazmışam.

- Çapı nə vaxta nəzərdə tutulur?

- Onu dəqiq deyə bilmərəm. Çünki o kitabda mənim xatirələrim yer alacaq. Təbim gəlməsə, yaza bilmirəm. Həmişə may ayında burnuma Şuşadakı çiçəklərin ətri gəlir...

- Sonuncu dəfə nə vaxt filmə çəkilmisiniz?

- Təxminən iki-üç il əvvəl "Axırıncı qala filminə çəkilmişəm. Hazırda gənc rejissor Ruslan Ağazadənin "Son pərdə" filminin hazırlıqları gedir. Çəkilişlər mayın sonundan başlamalıdır. Orada xalq artisti Fəxrəddin Manafov, əməkdar artist Mehriban Zəki, gənc aktrisa, həm də mənim bacım qızı Gülarə Manafova, Ruslan Ağazadə özü də çəkilir. Bu filmdə çox yeniliklər olmaldır.

- Teatrda vəziyyət necədir?

- Teatrda hər şey yaxşıdır. Dişimlə bağlı əməliyyat keçirmişdim, amma sentyabrdan yeni tamaşa üzərində işləməyə başlayacağam. Mayın 8-də - Şuşanın işğal günü mənim də oynadığım "Qarabağnamə" tamaşası nümayiş olunacaq.

İntiqam VALEHOĞLU
Ölkə.az