Rasim Balayev, Həmidə Ömərova, Amaliya Pənahova, Fizuli Hüseynov 5 milyonluq filmdə

Bollivudun tanınmış rejissoru Priyadarşan ilk dəfə Bakıda film çəkəcək. Bununla bağlı filmin yaradıcı heyəti və təşkilatçıları mətbuat konfransı keçirib.

Qeyd olunub ki, bu, Azərbaycanla Hindistan arasında gercəkləşəcək ilk kinolayihədir. Triller janrında olacaq tammetrajlı bədii filmdə baş rolu Hindistanın tanınmış kino aktyoru Mohanlal Vişvanatan Nair oynayacaq. Ekran işində həmçinin Aparna Nair və Sabu Siril çəkiləcək. Hindistan tərəfindən 20-yə yaxın kino işçisinin cəlb olunacağı filmdə həm də azərbaycanlı aktyorlar - xalq artistləri Amaliya Pənahova, Həmidə Ömərova, Rasim Balayev və əməkdar artist Fizuli Hüseynov rol alacaq. Çəkilişlər paytaxt Bakıda, həmçinin Azərbaycanın müxtəlif bölgələrində aparılacaq.

Bu təşəbbüsün əsas məqsədi Azərbaycanı dünyaya tanıtmaq, tarixi və mədəniyyəti ilə bağlı geniş məlumatlar yaymaqdır. Sözügedən layihə Hindistan və Azərbaycan arasında mədəni əlaqələrin daha da inkişaf etdirilməsinə, gələcəkdə kino və incəsənət sahəsində müxtəlif təşəbbüslərin reallaşdırılmasına zəmin yaradacaq, təcrübə mübadiləsi üçün imkanlar açacaq.

Qeyd edək ki, Priyadarşan filmoqrafiyası olduqca zəngindir. Rejissor Bollivud tarixində 2-ci ən çox film çəkən rejissordur. “Kanchivaram” filminə görə Hindistanın prezidenti tərəfindən iki dəfə ölkənin milli mukafatına layiq görülüb. Film sahəsindəki xidmətlərinə görə ölkəsinin müxtəlif ali mükafatlarını alan rejissor, həm də dövlət tərəfindən təsis edilən mülki “Padmashri” ödülü ilə mükafatlandırılıb. Fimoqrafiyası 89 filmlə zəngin olan Priyadarşan həm də müxtəlif ölkələrdə 168-dən çox reklam çarxını çəkib. Onun filmlərində hind kinosunun canlı əfsanəsi Amitab Baççan, Şahrux Xan, Anil Kapur, Akşay Kumar, Acay Devqan və Salman Xan kimi dünyada məşhur aktyorlar rol alıb.

Bildirək ki, film çəkmək təşəbbüsünü reallaşdırmaq məqsədilə Hindistanın “Full House” kino şirkəti, Azərbaycanın “MR-Pictures Pro” və “Amal Film Production” arasında razılıq əldə olunub.

Mətbuat konfransında çıxış edən Priyadarşan filmin iki ölkə arasındakı mədəni əlaqələrə təkan verəcəyini söyləyib. Ekran işinin büdcəsindən danışan məşhur rejissor işçi adı "Yekun qətnamə"nin beş milyona başa gələcəyini açıqlayıb. "Yekun qətnamə"nin karyerasının ən yaxşı filmi olacağına inandığını deyən Priyadarşan əlavə edib ki, filmin daha geniş auidotoriyaya yayılması üçün rus dilinə tərcüməsi də nəzərdə tutulur.

Filmdə rol alacaq xalq artistləri Amaliya Pənahova, Rasim Balayev, Həmidə Ömərova, əməkdar artist Fizuli Hüseynov isə qeyd ediblər ki, Azərbaycanda hind filmlərini sevən böyük tamaşaçı auidotoriyası var. Aktyorlar bildiriblər ki, məhz bu səbəbdən sözügedən filmin yerli publika tərəfindən böyük maraqla qarşılanacağı gözlənilir.

Sonda jurnalistlərin sualları cavablandırılıb.

İntiqam VALEHOĞLU
Ölkə.Az