“Euronews” Lahıc qəsəbəsi haqqında reportaj yayımladı

“Euronews” telekanalının “Life” proqramında Azərbaycanın İsmayıllı rayonunun Lahıc qəsəbəsi haqqında reportaj yayımlanıb.

Mədəniyyət və Turizm Nazirliyinin İctimaiyyətlə Əlaqələr Şöbəsindən Ölkə.Az-a verilən məlumata görə, “Azərbaycan həyatı” mövzusunda yayımlanan reportajda Lahıc Azərbaycanın qədim misgərlik və sənətkarlıq mərkəzi kimi qeyd olunub.

Reportajda Bakıdan 200 kilometr aralıda yerləşən Lahıc qəsəbəsinin tarixi və sənətkarları haqqında ətraflı məlumat verilir. Burada canlı tarixin qorunub saxlandığı vurğulanır.

Bununla yanaşı, reportajda misgərlik sənətindən geniş bəhs olunur. Bu sənətin nəsildən-nəslə ötürülərək bu günədək yaşadıldığı diqqətə çatdırılır. Burada hazırlanan mis qabların Lahıc kənd sakinlərinin evlərində və muzeylərdə saxlandığı bildirilir. Buna misal olaraq Luvr muzeyi qeyd olunur.

Ölkə.Az