\"Milyonçu\"nun Dj Fatehi məbləğlərin niyə az olmasını AÇIQLADI

Artıq bu mövsümdən İTV-nin efirində yayımlanacaq xalq arasında “milyonçu” adlandırılan “Milyonların şousu”nun anonsları sosial şəbəkələrdə müzakirələrə səbəb olub.

Ölkə.Az xəbər verir ki, bəzi izləyicilər, ilk suallar üçün qoyulan uduş məbləğinin nə üçün az olduğunu, bəziləri isə maksimum uduş məbləğinin 1 milyon yox, 100 min manat olmasını sual ediblər.

Şounun aparıcısı DJ Fateh Ölkə.Az-a açıqlamasında izləyicilərdən gələn sual və tənqidlərə münasibət bildirib. O deyib ki, verilişlə bağlı ən kiçik detal belə layihə müəllifi olan şirkətlə razılaşdırılıb:

“Məsələ ondadır ki,  bu layihə yalnız “Sony Pictures Television” adlanan şirkətin lisenziyası əsasında yayımlana bilər. Onlar bu layihənin müəllif hüquqlarının sahibidirlər. Bütün bu yayımlar zamanı hər bir detal, o cümlədən hər sualın dəyəri onlarla razılaşdırılır. Öz tərəfimdən bunu deyə bilərəm ki, adətən ilk suallarda məhz oyunun “qızışdırılması”, oyunçunun oyun ovqatına girməsi üçün asan suallar verilir. İlk suallara görə verilən pul mükafatı da buna uyğun müəyyənləşdirilib.  Diqqətli olsanız, görərsiniz ki, ilk 5 sual Azərbaycandakı əskinasların sıralaması ilə 10, 20, 50, 100, 200 AZN formasında düzülüb. Bu, lisenziya sahibi ilə razılaşdırılmış və onların tövsiyələri əsasında hazırlanmış “pul ağacı”dır”.

Aparıcı “milyonçu” adı ilə məşhur olunan şounun bizdə nə üçün “milyonların şousu” adlandırılması və maksimum uduş məbləğinin 100 min manat olması ilə bağlı iradlara da cavab verib:

“Biz də xəyal edərdik ki, ölkəmizdə bu müsabiqə keçirilirsə, orada 1 milyon manat verək. Amma reallıqdan çıxış etmək lazımdır. Düzdür, bu, tək bizdə belə deyil. Misal üçün, Türkiyədə 1 milyon lirə verilir, amma 1 milyon lirə bizim puldan cəmi 2 dəfə çoxdur. Türkiyə isə bizdən neçə dəfə böyük ölkədir. Rusiyada da ən böyük mükafat Azərbaycandakından 2 dəfə az – 50 min manatdır. Amma bu məbləğ milyon kimi ifadə olunub. “Sony Pictures Television”ın tövsiyəsi bu oldu ki, 100 min manat veriləcəksə, bu, verilişin adında öz əksini tapmalıdır. Belə olan halda veriliş heç cür “Kim milyonçu omaq istəyir?” adlana bilməz. O səbəbdən bizim mottomuz “kim zəngin olmaq istəyir” sualıdır, verilişin adı isə “Milyonların şousu”dur. Yəni bu, 10 milyondan çox həmvətənimizin qatılıb oynaya biləcəyi oyundur”.

DJ Fatehin sözlərinə görə, ikinci itirilməyən məbləğin iştirakçı tərəfindən müəyən edilməsi yarışanların xeyrinədir:

“İlk itirilməyən məbləğ 5-c sualın vəd etdiyi 200 AZN-dir. İkinci itirilməyən məbləği oyunçu oyun əsnasında müəyyən edir. Bu, qayda bir neçə ildir ki, layihənin digər ölkələrdəki yayımları zamanı istifadə olunmağa başlayıb və ondan sonra hər yeni yayımçıya da bu tövsiyə olunur. Çünki bu, oyunçunun maraqlarına daha çox xidmət edir. 10-cu suala qədər çatmağı  gözləmədən daha erkən mərhələlərdə oyun sənin üçün çətin gedirsə, köməklərinin hamısından istifadə etmisənsə, başa düşürsən ki, növbəti sual sənin üçün sonuncu ola bilər. O zaman 5-ci sualdan sonra istənilən sualı itirilməyən məbləğ kimi təyin edib bu pulu sanki özün üçün sığortalaya bilirsən”. 

DJ Fateh bizdə iştirakçılar üçün köməkçi variant sayının 3 olduğunu söyləyib:

“Bu, 50/50-yə köməyidir. Bu zaman kompüter 2 səhv variantı yığışdırır. Digəri auditoriyanın köməyidir. Üçüncüsü isə dosta zəng variantıdır. Bu zaman oyunçu əvvəlcədən bəyan etdiyi dostuna zəng edib ondan oynadığı sualla bağlı bir dəfə kömək istəyə bilir”. 

Aparıcı şounun ilk mövsümü üçün müraciətlərin həddindən çox olduğunu deyib:

“Biz ilk mövsümə böyük maraq gördük. Yalnız iddiaçı kimi 4500-dən çox insan anket göndərib. Onların bir qismi artıq oynayıb, bir qisminin isə növbəti  mövsümlərdə oynamaq ehtimalı var”.

Billurə Yunus