Anar Heybətov: \"Yəqin düşünürlər ki, fəxri ada layiq deyiləm\"

Akademik Milli Dram Teatrının tanınmış aktyoru Anar Heybətovun Ölkə.Az-a müsahibəsi.

- Anar bəy, əvvəlcə yaradıcılığınızdan danışaq. Hansı yeniliklər var?

- Hələ ki bir şey yoxdur. Amma sentyabr-oktyabr aylarında "Oskar" prodakşnla yeni filmin çəkilişlərinə başlamalıyıq. Serial sifarişimiz yoxdur. Sifariş olsa, onu da işləyəcəyik. Bir də teatrda tamaşalarda məşğulam.

- Bu teatr mövsümü sizinçün hansı hadisələrlə əlamətdar oldu?

- Digər mövsümlərdə olduğu kimi bu il də yeni tamaşalarda oynadım. Həmin tamaşalardan biri-xalq artisti Ramiz Novruzun quruluş verdiyi "Silindr" tamaşası dünən növbəti dəfə oynanıldı. Şükür, mənimçün hər mövsüm yaxşı olur. Bu, tək mənə yox, işini sevən hər kəsə aiddir. Əgər işini sevirsənsə, səninçün hər il yaxşı olur.

- Bildiyimə görə, səhhətinizdə problem var, təzyiqiniz yüksəkdir...

- Təzyiqdən şikayətim o qədər də çox deyil. Bir az sinir-əsəb sistemim pozulub.

- Bunun konkret səbəbi var, yoxsa ümumi gərginlik filan?

- Həkimlər deyir ki, yorğunluqla əlaqəlidir. Kardioqrama elətdirmişdim, dedilər ki, yorğunluq var.

- İstirahət etmək fikriniz varmı?

- Adam istəyir ki, hər il istirahət etsin, amma imkan olmur. İmkan olsa, istirahət etmək fikrimiz var.

- Burada, yoxsa xarici ölkələrdən birində?

- Buralarda elə teatrda səhnəyə çıxanda istirahət edirik.

- Sırf fiziki istirahəti nəzərdə tuturam...

- İmkanımız olsa, ən azından Türkiyəyə gedərik.

- Anar bəy, bizdə aktyorlar çox vaxt maddi problemlərdən gileylənirlər. Sizcə bu bir vərdişdir, yoxsa doğrudan da aktyorların vəziyyəti acınacaqlıdır?

- Vərdiş deyil. Aktyor gərək çəkilsin, işləsin qazansın ki, gileylənməsin. Yayda çəkilşlər dayanır deyə qazanmaq da olmur. İş olanda pul da olur.

- Amma yalandan gileylənənlər də var.

- Vallah onları deyə bilmərəm. Amma mən hər gün yuxudan duranda şükr edirəm ki, nəfəs alıram, salamatam. Az olanda az, çox olanda çox dolanırıq.

- Sənət adamları övladlarını davamçıları kimi görmək istəmirlər. Bilirəm ki, qız övladınız var. Aktrisa, yaxud müğənni olmaq istəsə, seçiminə müdaxilə edəcəksiniz?

- Qətiyyən olmaz, qızımın aktrisa olmasını istəmərəm. Çünki çox çətin sənətdir, çətin peşədir və burada hər adam dözə bilmir. Mən özüm güclə dözürəm.

- Yetərincə tanınırsınız, teatrda. seriallarda. filmlərdə rollarınız, gələn il də qırx yaşınız olur. Amma hələ də fəxri adınız yoxdur. Ümumiyyətlə, fəxri ad sizinçün önəmidirmi?

- Sentyabrda 39 yaşım tamam olacaq. Fəxri ad almamağım məno narahat eləmir. Düşünürəm ki, layiq biləndə verəcəklər.

- Yəni layiq deyilsiniz?

- Yəqin belə düşünürlər. Mən özüm haqda nəsə deyə bilmərəm. Bu, mənim təbiətimdə yoxdur. Özləri layiq bilsələr, verərlər.