Mətn ölçüsü:
  • 100%

I Avropa Oyunlarının açılış mərasiminin fəlsəfəsi

İctimai TV-də aparılan müzakirəyə sözardı

Tarixə qızıl damğasını vuran ilk Avropa Oyunları sona yaxınlaşmaq üzrədir. Gündəmi dəyişmək istəyənlərin gündəmini dəyişən bu möhtəşəm idman hadisəsini üzərimizə yürüyənlərin arzu və istəklərinə rəğmən sözün əsil mənasında HADİSƏYƏ çevirməyi bacardıq. Bu isə ilk növbədə ölkə prezidentinin, ilk Avropa Oyunlarının ağır yükünü və məsuliyyətini çiyinlərində daşıyaraq mükəmməl təşkilatçılıq bacarığı sərgiləyən birinci xanımın və təbii ki, bütövlükdə Azərbaycan xalqının tarixi uğurudur. Bu qısa, lakin məsuliyyətli zaman kəsiyində barmaqla sayılacaq qədər istisnalar olmaqla hər bir azərbaycanlı işi və bacarığı ilə ilk Avropa Oyunlarının yüksək səviyyədə keçirilməsinə öz töhfəsini verməyə çalışdı. Ölkənin kütləvi informasiya vasitələrinin təmsilçiləri də həmçinin...
Ən ağır yük, təbii ki, yenə də telekanalların üzərinə düşdü. AzTV, İdman Azərbaycan, İctimai TV, Lider, ANS və digər telekanallar bu böyük tarixi hadisənin mahiyyətini və miqyasını tamaşaçılara çatdırmaq üçün bacarığını əsirgəmədi.

Bu prosesdə ən ağır yükün və məsuliyyətin Avropa Oyunlarının yayımını həyata keçirən AzTV və İdman Azərbaycan telekanallarının üzərinə düşdüyü faktı ilə yəqin ki, hər kəs razılaşar. Hər iki telekanalın fədakarlığı göz qabağındadır.

Bununla yanaşı, ilk Avropa Oyunlarının mahiyyətinin tamaşaçıya çatdırılmasında İctimai TV-nin də oynadığı rolun əhəmiyyətini vurğulamaq yerinə düşərdi.
Düşünürəm ki, İctimai TV-nin bütün verilişləri ilk Avropa Oyunlarının daşıdığı missiyanın miqyasının, eləcə də bu mötəbər idman yarışının fəlsəfi anlamının, ictimai və mədəni əhəmiyyətinin ən incə məqamlarınadək şərh olunmasına xidmət edir və bu proses hər gün daha yüksək peşəkarlıqla irəli aparılır. “Aktual mövzu”, “Vətənin səsi”, “Müzakirə vaxtı” və digər verilişlərdə ilk Avropa Oyunlarının açılış mərasimi və oyunlar çərçivəsində təşkil olunan tədbirlər barədə Azərbaycan xalqının tarixi, mədəniyyəti, dünyagörüşü çərçivəsində, ümumbəşəri dəyərlər müstəvisində müzakirə olunur, ciddi intellektual dəyərləndirmələr aparılır. Əslində bu yanaşma İctimai TV-nin öz təyinatı üzrə fəaliyyət göstərməsindən, maarifləndiricilik missiyasını uğurla yerinə yetirməsindən, ictimai maraqların müdafiəçisi kimi çıxış etməsindən irəli gəlir.

İlk Avropa Oyunları barədə İcrimai TV-də aparılan bütün müzakirələrin əhəmiyyətli olduğunu, yüksək peşəkarlıqla hazırlandığını vurğulamaqla diqqəti adıçəkilən telekanalla iyunun 19-da yayımlanan “Müzakirə vaxtı” verilişinə çəkmək istəyirəm. Qeyd etməliyəm ki, mövzunun adı çox uğurla seçilmişdi və peşəkar yanaşma tələb edirdi: “I Avropa Oyunlarının açılış mərasiminin fəlsəfəsi”. Maraqlı yanaşmadı və əslində I Avropa Oyunlarının açılış mərasimində yer alan bütün komponentləri bir araya gətirən, bütövləşdirən bir baxış bucağıdı. İlk Avropa Oyunlarının açılış mərasimini özünəqədərki anoloji tədbirlərdən fərqləndirən də məhz bu mərasimin dərin fəlsəfi məna kəsb etməsidir. Qənaətimə görə, jurnalist Vəsilə Vahidqızının peşəkarlığı, millət vəkili Tahir Rzayev, “Xalq Cəbhəsi” qəzetinin baş redaktoru Elçin Mirzəbəyli və tarix elmləri doktoru Kərim Şükürovun mövzunu – I Avropa Oyunlarının açılış mərasiminin fəlsəfəsini ən dərin qatlarına kimi incələmək bacarığı sayəsində çoxsaylı suallara cavab tapmaq mümkün oldu. Qısa bir zaman kəsiyində açılış mərasimin fəlsəfi-estetik mahiyyəti ən incə məqamlarına kimi şərh olundu. Bu baxımdan, hesab edirəm ki, “Mazikirə vaxtı”nın iyunun 19-da yayımlanan buraxılışı I Avropa Oyunları ilə bağlı verilişlərin ən uğurlularından biri kimi hələ uzun müddət yaddaşlarda qalacaq və təkrar-təkrar izləniləcək./baymedia.az/

Ölkə.Az